Bill Clinton tërheq kritika pasi tha se Izraeli ishte i detyruar të vriste civilët në Gaza

Ish-presidenti i Shteteve të Bashkuara, Bill Clinton, po përballet me reagime nga myslimanët dhe arabo-amerikanët, pasi tha se Izraeli është “detyruar” të vrasë civilët në Gaza dhe sugjeroi se Izraeli ishte në Tokën e Shenjtë “i pari”, përpara palestinezëve.

Duke folur në një tubim për kandidaten demokrate Kamala Harris në Michigan – një shtet vendimtar amerikan me popullsi të madhe arabe dhe myslimane, të cilët demokratët po përpiqen të fitojnë – Clinton tha se ai i kupton shqetësimet e njerëzve për gjakderdhjen në Gaza, por theksoi se Izraeli nuk ka zgjidhje tjetër veçse të shkaktojë humbje të mëdha civile.

Kjo edhe pse akuzohet për gjenocid në Gjykatën Ndërkombëtare të Drejtësisë.

Që nga shpërthimi i luftës së Izraelit në Gaza, forcat izraelite kanë vrarë më shumë se 43 mijë njerëz në enklavën palestineze, shumica gra dhe fëmijë.

Një komision i mbështetur nga Kombet e Bashkuara ka akuzuar ushtrinë izraelite për “krime kundër njerëzimit” gjatë luftës, duke përfshirë urinë e detyruar dhe sulmet e qëllimshme ndaj civilëve.

Clinton gjithashtu nxiti polemika kur tha se izraelitët ishin në Tokën e Shenjtë “të parët”.

“Fyese dhe islamofobike”

Udhëheqësit arabo-amerikanë dhe myslimanë-amerikanë kritikuan Clinton-in për antagonizimin e komuniteteve, votat e të cilëve demokratët kanë kërkuar në zgjedhjet e 5 nëntorit në SHBA.

“Vështirë të mendohet për një mënyrë më kundërproduktive për të dërguar këtë mesazh”, shkroi Yousef Munayyer, kreu i programit Palestinë/Izrael në Qendrën Arabe në Washington DC.

“Përpjekja e pashpirt dhe e pandershme e Bill Clinton për të justifikuar sulmet e Qeverisë izraelite ndaj civilëve në Gaza ishte sa fyese aq edhe islamofobike”, tha Robert S McCaw, drejtor i çështjeve qeveritare në Këshillin për Marrëdhëniet Amerikano-Islamike, në një deklaratë.

Pavarësisht se tradicionalisht votojnë Demokratët, shumë arabo-amerikanë po largohen nga partia këtë vit për shkak të zemërimit për mbështetjen e palëkundur të Presidentit Joe Biden për Izraelin.

Një sondazh i fundit sugjeron se më shumë arabo-amerikanë mbështesin kandidatin republikan Donald Trump sesa Harris, një prirje që mund të jetë e rëndësishme në Michigan.