Natë e përgjakshme në Gjermani, 24-vjeçari nga RMV përfundon në operacion

Një 24-vjeçar, shtetas i Maqedonisë së Veriut, ka mbetur rëndë i plagosur pas një përleshjeje mes dy grupeve në qytetin gjerman Bad Segeberg.

Ngjarja ka ndodhur të shtunën rreth orës 04:20 në rrugën “Kirchstraße”, pranë sheshit të qytetit. Sipas policisë gjermane, gjithçka nisi me një debat verbal, i cili më pas degjeneroi në përleshje fizike.

Gjatë konfliktit, një 23-vjeçar me shtetësi gjermane dyshohet se ka përdorur thikë dhe ka plagosur rëndë 24-vjeçarin nga Maqedonia e Veriut. Në përleshje është plagosur edhe një 23-vjeçar nga Iraku.

I riu 24-vjeçar është transportuar me urgjencë në spital, ku i është nënshtruar një ndërhyrjeje kirurgjikale. Fillimisht gjendja e tij është konsideruar kërcënuese për jetën, ndërsa pas operacionit mjekët kanë konfirmuar se rreziku për jetën ka kaluar.

Pas incidentit, tre persona, mes tyre edhe i dyshuari kryesor, janë larguar nga vendi me një automjet. Policia më vonë i ka gjetur në një klinikë, ku janë arrestuar përkohësisht.

Megjithatë, pas përfundimit të procedurave të para hetimore, prokuroria ka urdhëruar lirimin e tyre dhe vazhdimin e procedurës në liri.

Policia kriminale në Bad Segeberg po vazhdon hetimet për zbardhjen e plotë të rrethanave të përleshjes dhe ka kërkuar nga dëshmitarët që të kontaktojnë autoritetet.