Kupa e Botës për Klube, Neuer dhe Müller njëzëri: Objektivi i Bayern-it, fitorja

Misioni i Kupës së Botës për Klube ka nisur zyrtarisht për Bayern-in. Skuadra gjermane ndodhet në grumbullim në Orlando që nga e marta, me gjysmën e skuadrës në dispozicion, ndërsa lojtarët që kanë qenë të angazhuar me kombëtaret e tyre do t’i bashkohen ekipit në ditët në vijim. Dje u zhvillua seanca e parë stërvitore në tokën amerikane dhe mbërritën edhe deklaratat e kapitenëve Manuel Neuer dhe Thomas Müller, të cilët folën për pritshmëritë e tyre për këtë turne.

“E përballojmë këtë kompeticion me synimin për të fituar ndeshjet dhe do të provojmë ta bëjmë këtë që në të parën, sigurisht,” deklaroi Müller. “Fryma në ekip është e duhura dhe trajneri nuk ka lënë asnjë dyshim. Ai e ka thënë qartë: duam të fitojmë.”

Müller e di që kjo do të jetë paraqitja e tij e fundit me fanellën e Bayern-it, por nuk ka vend për trishtim: “Jam thjesht i lumtur që jam këtu. Sigurisht, gjëja më e bukur për mua është të zbres në fushë.”

Edhe Neuer, bashkëlojtar prej shumë vitesh me Müllerin, është i entuziazmuar për të nisur aventurën në Kupën e Botës për Klube. “Është diçka speciale të jesh këtu,” tha portieri. “Jemi të pranishëm në këtë turne për të luajtur futboll fitues. Për rrjedhojë, edhe ne duam të luftojmë për titullin. Besoj se pas disa vitesh do ta kuptojmë më mirë rëndësinë e këtij formati turneu.”

Bavarezët do të përballen të dielën (ora 12:00 me orën lokale në Cincinnati) me Auckland City FC.

“Skuadra jonë e analistëve do të na përgatisë,” tha Neuer në prag të ndeshjes hapëse. “Do të analizojmë me detaje çfarë kanë bërë kundërshtarët tanë këtë sezon dhe si kanë luajtur, kështu që përgatitja do të jetë si për çdo ndeshje zyrtare – ndoshta pak më e gjatë sepse nuk e njohim mirë skuadrën. Gjithmonë është shumë e rëndësishme të fitosh ndeshjen e parë në këto turne. Duam të fillojmë me këmbë të mbarë.”