Sulmi i parë për Gyokeres: Arsenali në bisedime me Sportingun

Arsenali ka hedhur hapin e parë konkret për të siguruar shërbimet e sulmuesit suedez të Sportingut të Lisbonës, Viktor Gyokeres. Sipas raportimeve nga media portugeze Record, drejtori sportiv i “Topçinjve”, Andrea Berta, ka zhvilluar një takim me homologun e tij të Sportingut, Bernardo Palmeiro, në Menorca të Spanjës, të mërkurën.

Gjatë takimit, Arsenali ka paraqitur një ofertë zyrtare për kartonin e sulmuesit 26-vjeçar, i cili ka shkëlqyer këtë sezon në Primeira Liga. Megjithatë, oferta nuk ka përmbushur pritshmëritë financiare të klubit portugez, që duket se nuk është i gatshëm të heqë dorë nga lojtari për një çmim më të ulët se klauzola e tij e lirimit.

Presidenti i Sportingut, Frederico Varandas, e ka cilësuar më parë si të pavërtetë shifrën prej 70 milionë euro që është përmendur në mediat ndërkombëtare, duke lënë të kuptohet se klubi kërkon më shumë për yllin e tyre kryesor.

Gyokeres ka qenë një nga zbulimet më të mëdha të këtij sezoni në futbollin evropian. Ai ka shënuar 43 gola dhe ka dhënë 15 asistime në të gjitha garat me Sportingun, duke ndihmuar klubin të fitojë titullin kampion në Portugali për herë të parë që nga viti 2021.

Përveç Arsenalit, interesim për Gyokeres kanë shfaqur edhe klube të tjera të mëdha si Chelsea dhe Atlético Madrid, por londinezët duket se janë më konkret në përpjekjet e tyre për ta transferuar.

Negociatat pritet të vazhdojnë në javët në vijim, me Arsenalin që mund të rikthehet me një ofertë të përmirësuar për të bindur Sportingun.

Flaka