Kriza në SHBA – Pochettino kundër yllit të Milanit

Trajneri i Kombëtares së Shteteve të Bashkuara të Amerikës, Mauricio Pochettino, ka reaguar me tone të forta pas polemikave të krijuara nga refuzimi i tij për ta përfshirë Christian Pulisic në dy ndeshjet miqësore para Kupës së Artë CONCACAF.

Mesfushori i Milanit ishte i gatshëm të luante vetëm në miqësore, por kishte kërkuar të mos ishte pjesë e turneut, për shkak të lodhjes së akumuluar gjatë dy sezoneve të fundit, ku ka zhvilluar rreth 120 ndeshje për klubin dhe kombëtaren.

Por Pochettino nuk pranoi këtë kompromis dhe e përjashtoi Pulisic plotësisht:
“Unë jam trajneri, nuk jam manekin. Lojtarët nuk mund ta diktojnë planin,” u shpreh argjentinasi para sfidës së parë të SHBA-së ndaj Trinidad & Tobagos.

Pulisic, në një prononcim për CBS Sports, deklaroi se e respekton vendimin e trajnerit, por nuk e kupton.
Por Pochettino ishte i prerë:
“Lojtarët nuk kanë nevojë ta kuptojnë. Ata nuk e drejtojnë ekipin.”

Ai krahasoi situatën edhe me Sergiño Dest, i cili u përjashtua nga kampi stërvitor për shkak të gjendjes së rikuperimit fizik, duke theksuar se vendimet për përfshirjen e lojtarëve nuk merren vetëm mbi dëshirën individuale, por në bazë të analizës mjekësore dhe planit të stafit teknik.

“Vendosim ne nëse një lojtar ka nevojë për pushim. Kemi ekipe të tëra mjekësore që bëjnë këtë vlerësim, jo lojtarët,” theksoi trajneri.

Pochettino gjithashtu hodhi poshtë idenë se Pulisic është i pazëvendësueshëm:
“Ju thoni ‘lojtari më i mirë’? Po, është një lojtar i mirë, por duhet të performojë. Nuk mjafton të thuash ‘dua të jem atje’.”

Flaka