Nafie Selmani: “Nga ‘Ndryshimi’ te zhgënjimi! VLEN përballë humbjes historike”

Nga Nafie Selmani

Sipas analizave prestigjioze të opinionit publik dhe të atmosferës politike në kampin shqiptar, zgjedhjet e tetorit pritet të sjellin një rrokadë të madhe politike në kampin shqiptar. Të dhënat e deritanishme tregojnë një saktësi të lartë, me marzh gabimi prej vetëm 1%, dhe po dëshmojnë se klima aktuale është dukshëm në favor të AKI-së.

Arsyeja kryesore për këtë zhvendosje është zhgënjimi i thellë i elektoratit të VLEN-it. Ata erdhën me parullën për “Ndryshim te madh”, por në vend që ta realizojnë, e shndërruan atë në mashtrim elektoral. Premtuan transparencë, përgjegjësi dhe politikë të re, por në praktikë u treguan kopje e zbehtë e të vjetrës, duke vazhduar me pazare, nepotizëm dhe retorikë koti të stilit: blla, blla, blla. Sot, shumica e votuesve të tyre ndihen të tradhtuar, mashtruar dhe të përdorur.

Kjo pakënaqësi masive ka krijuar një boshllëk që AKI-ja po e mbush me shpejtësi, duke u shfaqur si forca që kanalizon revoltën e elektoratit shqiptar ndaj dështimit të VLEN-it. Nëse ky trend vazhdon, epërsia e AKI-së jo vetëm që do të konfirmohet, por edhe do të thellohet në mënyrë të pandalshme, duke çuar në një përmbysje të balancave politike dhe në një humbje historike për VLEN-in.

Shqiptarët e kuptuan qartë se nga “Ndryshimi” përfituan vetëm nipërit, djemtë, tezakët, familjarët dhe jaraneshat e krerëve të VLEN-it.

Zgjedhjet e tetorit, në këtë mënyrë, do të jenë fundi i iluzionit të VLEN-it dhe fillimi i një konfigurimi tjetër politik, ku elektorati nuk pranon më mashtrime me emrin e “Ndryshimit”.