Osmani: Propozim-ligji për përfaqësim të drejtë është mashtrim politik, Balancuesi garantonte barazi reale

Nënkryetari i BDI-së, Bujar Osmani, ka kritikuar ashpër të ashtuquajturin propozim-ligj për përfaqësim të drejtë dhe adekuat, duke e cilësuar atë si “shembull klasik të mashtrimit politik”, me shumë deklarata të bukura, por pa asnjë garanci reale për zbatim.

“Shumë fjali të bukura, shumë ‘vullnet të mirë’, por asnjë garanci reale. Ligjet nuk bëhen për njerëz me qëllime të mira; ligjet bëhen pikërisht kur vullneti i mirë mungon, për t’i mbrojtur qytetarët nga padrejtësia dhe arbitrariteti i pushtetit,” theksoi Osmani.

Sipas tij, dallimi thelbësor mes këtij propozimi dhe Balancuesit qëndron në faktin se Balancuesi ishte instrument konkret për zbatimin e Amendamentit 6 të Kushtetutës, ndërsa ligji i ri, sipas Osmanit, mbetet vetëm një deklaratë politike.

“Balancuesi ishte instrument konkret për zbatimin e amendamentit 6 të Kushtetutës, jo deklaratë politike. Ai i ka mbrojtur të gjitha komunitetet, në çdo nivel,” deklaroi Osmani.

Ai shtoi se Balancuesi ka garantuar përfaqësim të drejtë edhe për komunitetin maqedonas, duke siguruar që në asnjë institucion të mos bien nën përqindjen e tyre në shtet, si dhe ka mbrojtur shqiptarët, turqit, romët dhe vllehët.

“Ia hiqte drejtuesve të institucioneve mundësinë të zgjedhin njerëz sipas preferencave etnike apo politike dhe i detyronte t’i nënshtrohen një mekanizmi objektiv, ligjor dhe të automatizuar,” u shpreh Osmani, duke theksuar se Balancuesi ka respektuar plotësisht parimet profesionale dhe meritokratike.

Osmani theksoi se Balancuesi nuk e ka anashkaluar meritokracinë, por përkundrazi e ka mbrojtur atë nga kapja politike.

“Heqja e Balancuesit është si heqja e klauzolës së inkluzionit në çdo shtet evropian. Nuk është modernizim, është regres institucional,” tha ai, duke shtuar se inkluzioni nuk është opinion apo modë ideologjike, por standard i funksionimit të institucioneve moderne.

Një tjetër element i rëndësishëm, sipas Osmanit, është fakti se Balancuesi ka vepruar parandalueshëm, para punësimit.

“Balancuesi ka vepruar ex ante. E ka parandaluar shkeljen, nuk e ka regjistruar pasi është bërë dëmi. E ka kthyer barazinë nga vullnet i lirë në detyrim kushtetues,” deklaroi Osmani.

Në anën tjetër, ai vlerëson se propozim-ligji i ri e zhvendos barazinë nga e drejtë në dëshirë dhe nga obligim në politikë publike, në një shoqëri me paragjykime reale etnike.

“Kur ligji lë hapësirë, padrejtësia gjithmonë e shfrytëzon. Prandaj ky ligj nuk duhet të kalojë,” theksoi Osmani.

Në përfundim, nënkryetari i BDI-së e cilësoi këtë propozim si një “paketim të një çmontimi”, me titull të bukur, por me përmbajtje bosh. Gazeta Flaka