Aleanca për Shqiptarët: “Premtuan bankë shqiptare, ndërsa kapitali serb po forcon pozitat në sistemin bankar”

Aleanca për Shqiptarët ka kritikuar koalicionin VLEN për mosrealizimin, sipas tyre, të premtimit për themelimin e një banke shqiptare në Maqedoninë e Veriut.

“Premtuan bankë shqiptare. Premtuan kapital shqiptar. Premtuan fuqizim ekonomik të shqiptarëve”, thuhet në reagimin e Aleancës për Shqiptarët.

Sipas tyre, kanë kaluar më shumë se dy vite nga ardhja në pushtet, ndërsa premtimi për bankë shqiptare nuk është konkretizuar.

“Kaluan mbi dy vite dhe nga banka shqiptare as emri, as adresa, as themeli!”, thekson partia.

Në të njëjtën kohë, Aleanca për Shqiptarët i referohet ndryshimeve në pronësinë e Alta Bankës në Manastir, duke pretenduar se Alta Banka e Beogradit tashmë zotëron 95.23 për qind të aksioneve të Alta Bankës në Manastir.

“Ja bilanci i VLEN-it. Banka shqiptare mbeti në programin zgjedhor, ndërsa kapitali serb po forcon pozitat në sistemin bankar të vendit”, deklaron Aleanca për Shqiptarët.

Partia i drejton disa pyetje VLEN-it, duke kërkuar të dijë se ku ka mbetur premtimi për bankën shqiptare.

“Ku është banka që ua premtuat shqiptarëve? Ku janë kushtet që thatë se do t’i krijonit?”, pyet ASH-ja.

Në reagimin e saj, Aleanca për Shqiptarët akuzon pushtetin se po i ushqen shqiptarët me premtime, ndërsa zhvillimet në sektorin bankar, sipas saj, po shkojnë në drejtim të kundërt.

“Sa kohë mendoni se mund t’i ushqeni shqiptarët me premtime, derisa para syve të tyre ndodh krejt e kundërta?”, thuhet më tej.

Në fund, ASH-ja e përmbledh kritikën me një bilanc politik:

“Dy vite pushtet. Zero bankë shqiptare. 95.23% Alta Banka Beograd. Ky është rezultati.”

Pretendimet janë pjesë e reagimit politik të Aleancës për Shqiptarët dhe nuk përbëjnë vetvetiu konstatim institucional për përgjegjësinë e VLEN-it apo për ndikimin e kapitalit serb në sistemin bankar. Gazeta Flaka