“Ballistët” shpërthejnë ndaj FFM-së: Dënimi i Shkëndijës është politik dhe selektiv

Tifogrupi “Ballistët” ka reaguar ashpër ndaj vendimit të fundit të Federatës së Futbollit të Maqedonisë (FFM), duke e cilësuar dënimin financiar ndaj KF Shkëndija si selektiv, të padrejtë dhe me prapavijë politike.

Përmes një komunikate publike të publikuar nga faqja zyrtare “Ballistet Tetove 1992”, tifogrupi kuqezi ka akuzuar federatën për standarde të dyfishta dhe trajtim diskriminues ndaj klubit tetovar, duke krahasuar dënimet e shqiptuara për përdorim të mjeteve piroteknike.

Sipas tyre, KF Sileks është dënuar me 5.000 euro për të njëjtën shkelje, ndërsa KF Shkëndija është gjobitur me 15.000 euro.

“Nëse i krahasojmë dënimet për ngjarje të njëjta te klubet e tjera, ky i fundit është skandaloz, i pamenduar mirë dhe i qëllimshëm”, thuhet në reagimin e tifogrupit.

“Ballistët” kërkojnë reagim institucional dhe politik, duke i bërë thirrje faktorit politik shqiptar që të ushtrojë presion për rishikimin e vendimit. Në të kundërtën, ata paralajmërojnë se mosveprimi do të konsiderohet si paaftësi politike.

Në reagimin e tyre, tifozët i janë drejtuar edhe sponsorit kryesor të klubit, Lazim Destani, me kërkesën që të mos ketë tërheqje apo dorëzim, por të vazhdohet me investime dhe mobilizim për sezonin e ardhshëm.

Ata kërkojnë forcimin e bashkëpunimit mes kryesisë, tifozëve dhe sponsorëve, duke e cilësuar këtë si moment kyç për rikthimin më të fuqishëm të klubit.

Në fund të reagimit, “Ballistët” theksojnë se do të vazhdojnë të qëndrojnë pranë klubit dhe se mbështetja ndaj Shkëndijës mbetet e pakushtëzuar. Gazeta Flaka