Hava Miftari doktoron me studim mbi mikrobiotën në produktet tradicionale

Nga një fshat i vogël në Gostivar drejt majave të shkencës – Hava Miftari ka kurorëzuar me sukses rrugëtimin e saj akademik duke fituar titullin “Doktore e shkencave tekniko-teknologjike”.

Studimet e doktoraturës ajo i përfundoi në Universiteti “Shën Kliment Ohridski” në Manastir, në kuadër të Fakultetit të Shkencave Teknike dhe Teknologjike në Veles, duke u specializuar në teknologjitë inovative për ushqim dhe nutricion.

Punimi i saj shkencor, me fokus në produktet tradicionale, trajton “dinamikën mikrobiale dhe karakterizimin e baktereve autoktone të acidit laktik në djathin e bardhë të dhisë të prodhuar në mënyrë tradicionale në shëllirë”. Përmes këtij hulumtimi, Miftari sjell një qasje të detajuar mbi rolin e mikroorganizmave në cilësinë, sigurinë dhe vlerat funksionale të ushqimit, duke kontribuar në ruajtjen dhe avancimin e produkteve autentike.

Procesi i doktorimit u udhëhoq nga mentorja, Prof. dr. Daniela Nikolovska Nedelkoska, ndërsa në komisionin vlerësues morën pjesë edhe profesorët Tatjana Kalevska, Tatjana Blazevska, Vezirka Jankuloska dhe Ismail Ferati.

Ky sukses nuk është vetëm një arritje personale për Hava Miftarin, por edhe një dëshmi se përkushtimi dhe puna e vazhdueshme mund të çojnë të rinjtë drejt rezultateve të larta shkencore, duke shërbyer si frymëzim për brezat e rinj në rajon. Gazeta Flaka