Kumanovë, mobilizohen studentët për protestën e radhës

Pasditen e së dielës, studentët e universiteteve shqiptare të RMV-së, të drejtimit të Juridikut, të cilët protestuan së fundmi në Shkup për dhënien e provimit të jurisprudencës në gjuhën shqipe, nga qyteti i Kumanovës filluan mobilizimin e hapave të mëtutjeshme rreth kërkesave të tyre. Në debatin e organizuar mes studentësh në shkollën fillore komunale “Naim Frashëri”, ata u njohën me situatën aktuale, si dhe u këshilluan për organizimet e radhës.    

“Takohemi me kolegët dhe studentët e qytetit të Kumanovës, të cilët edhe e mbështetën protestën tonë, njihemi me ata, ua dëgjojmë këshillat dhe në përgjithësi jemi në qëndrimin tonë të përbashkët. Bashkimi i studentëve shqiptarë është rëndësia jonë dhe që çdo kërkesë e radhës të jetë e njëzëshme. Qëllimi kryesor i debatit të sotëm ishte në lidhje me përdorimin e gjuhës shqipe në institucionet dhe provimin e jurisprudencës.”, – deklaroi organizatori i protestave studentore, Mevlan Ademi. 

“Qëllimi i këtij takimi ishte që të bisedojmë rreth protestës që realizuam, ankesa, sugjerime apo vlerësime rreth saj, me qëllim që të vazhdohet në mënyrën e njëjtë, si dhe t’i informojmë në numër sa më të madh se për çka kemi dalë dhe çka është provimi i Jurisprudencës.”, – theksoi studentja në UNT, Arlinda Emini. 

“Realisht jemi të kënaqur, pasi që kishte vullnet për të komunikuar, për të shprehur ide të ndryshme dhe për të pasur një pasqyrë më të qartë se si e shohin ata perspektiven e tyre, kauzën tonë, që na bëri të ndjehemi krenarë me faktin se ata ndihen pjesë e kësaj.”, – u shpreh studenti në UNT, Jon Selimi.

Nga ky debat u konstatua se përderisa refuzohet kërkesa e tyre, ata do të vazhdojnë me protesta deri në realizimin e të njëjtave. Gjithashtu u paralajmërua se debate të këtilla me studentë do të organizohen edhe në qytete tjera të vendit.