Lamine Yamal kritikon akademitë moderne: Futbollit po i mungon kreativiteti dhe argëtimi

Lamine Yamal ka shprehur shqetësimin e tij për mënyrën se si po zhvillohen futbollistët e rinj në akademitë moderne.

Sipas tij, futbolli po bëhet gjithnjë e më i strukturuar dhe i kufizuar nga skemat taktike, duke lënë më pak hapësirë për kreativitetin individual dhe spontanitetin që dikur e bënin lojën më tërheqëse.

“Problemi që shoh te lojtarët e rinj sot është se u thuhet vazhdimisht çfarë duhet të bëjnë. Mbrojtësi i krahut duhet t’ia japë topin anësorit, anësori mesfushorit dhe të gjithë duhet të sulmojnë e të mbrojnë sipas të njëjtit model”, u shpreh Yamal.

Ai kujtoi me nostalgji futbollin e rrugës, ku sipas tij mbizotëronin argëtimi dhe imagjinata.

“Kur luaja në rrugë, rregulli ishte i thjeshtë: kush shënonte dy gola fitonte, ndërsa humbësi dilte jashtë. Kishte më shumë kënaqësi dhe kreativitet”, tha talenti spanjoll.

Yamal shtoi se i vjen keq që sot njerëzit nuk e shijojnë futbollin si më parë, duke theksuar se në fëmijëri ndiqte vazhdimisht ndeshje dhe frymëzohej nga lojtarët që sillnin magji në fushë.

Sipas tij, futbolli modern ka nevojë për më shumë futbollistë me stil të lirë dhe kreativ, si Ronaldinho, Neymar, Isco, Vinícius Júnior, Karim Benzema dhe Rayan Cherki.

Deklaratat e tij kanë nxitur diskutime të shumta mes tifozëve dhe ekspertëve, të cilët vazhdojnë të debatojnë nëse futbolli modern po humbet individualitetin në favor të disiplinës taktike.

Flaka