Paga minimale 600 euro shkon në Kuvend – diskutimi në Tetor

Propozim-ligji i LSDM-së opozitare për rritjen e pagës minimale në 600 euro, ose 36.960 denarë, pritet të futet në rendin e ditës së Kuvendit në fillim të muajit tetor.

Këtë e ka bërë të ditur kryetari i Kuvendit, Afrim Gashi, i cili tha se partitë politike deri atëherë kanë kohë të përcaktojnë qëndrimet e tyre për nismën.

“Ky propozim-ligj është propozuar nga partia opozitare dhe do të vendoset në rend të ditës menjëherë në fillim të muajit tetor, në seancën e parë të radhës”, tha Gashi gjatë brifingut me gazetarët. Sipas tij, mund të nevojiten edhe bisedime ndërmjet partive për të arritur një qëndrim rreth propozimit.

Gashi theksoi se origjina partiake e një propozimi nuk duhet të jetë përcaktuese nëse një ligj është në interes të qytetarëve.

“Nëse është në interes të qytetarëve, pse mos të përkrahet një ligj dhe nuk është me rëndësi se nga kush propozohet, por me rëndësi është që ai ligj të jetë në interes të qytetarëve”, tha ai.

Kryetari i Kuvendit foli edhe për qëndrimin e tij personal lidhur me pagën minimale. Ai tha se, në parim, mbështet një rritje të vazhdueshme të pagave, duke e lidhur këtë me presionin që inflacioni dhe kostoja e jetesës krijojnë mbi standardin e qytetarëve.

“Personalish jam i mendimit që pagat të jenë në një rritje të vazhdueshme. Mendoj që kjo e shëndoshë ekonominë dhe është për të mirën e ekonomisë në përgjithësi”, deklaroi Gashi.

LSDM-ja e ka dorëzuar për herë të tretë propozimin për pagë minimale prej 600 eurosh. Sipas partisë, paga minimale aktuale është rreth 26 mijë denarë, ndërsa propozimi parasheh që ajo të arrijë në 36.960 denarë.

Vendosja e propozimit në rend dite nuk nënkupton miratimin e tij. Qëndrimi përfundimtar i shumicës parlamentare dhe i grupeve të tjera parlamentare pritet të bëhet i qartë gjatë debatit dhe procedurës në Kuvend. Gazeta Flaka