Përplasje e re Shkup–Sofje, Bullgaria kërkon obligime, Mickoski refuzon kushtëzimet

Tensionet politike mes Shkupit dhe Sofjes për rrugën eurointegruese të Maqedonisë së Veriut vazhdojnë, pasi ministrja e Punëve të Jashtme e Bullgarisë, Velislava Petrova, përsëriti se Sofja nuk do të tërhiqet nga marrëveshjet dhe kushtet e dakorduara në vitin 2022.

Në një deklaratë për televizionin kombëtar bullgar, Petrova theksoi se çështja nuk duhet parë si problem bilateral, por si pjesë e marrëdhënieve ndërmjet një vendi kandidat dhe Bashkimit Evropian. Ajo u bëri thirrje autoriteteve në Shkup që të shfrytëzojnë momentin aktual të zgjerimit të BE-së dhe të shmangin, siç tha ajo, përshkallëzimin e tensioneve me Sofjen.

Nga ana tjetër, kryeministri Hristijan Mickoski reagoi ashpër ndaj qëndrimeve bullgare, duke deklaruar se Qeveria nuk do të pranojë kushte shtesë për anëtarësimin në Bashkimin Evropian.

Sipas Mickoskit, nëse Bullgaria pret që Maqedonia të pranojë kërkesat e saj për të avancuar në procesin eurointegrues, atëherë ekzekutivi aktual nuk do të ndryshojë qëndrim. Ai e cilësoi këtë qasje si “kushtëzim dhe bullizim”, duke shtuar se marrëdhëniet e mira fqinjësore duhet të jenë reciproke.

Ndërkohë, drejtori i Institutit Prespa, Andreja Stojkovski, vlerëson se Shkupi nuk duhet të presë pasivisht zgjidhje nga Brukseli lidhur me propozimet e reja për zgjerimin e BE-së. Sipas tij, vendi duhet të jetë më aktiv diplomatikisht dhe të kërkojë një proces paralel që do të çonte drejt anëtarësimit të plotë në Bashkimin Evropian.

Stojkovski shtoi se ekziston mundësia që propozimi i kancelarit gjerman Friedrich Merz të harmonizohet politikisht dhe të marrë mbështetje në samitin e Ballkanit Perëndimor që do të mbahet më 5 qershor në Tivat.

Zëdhënësja e LSDM-së, Bogdanka Kuzeska, ka deklaruar se Maqedonia po largohet nga Bashkimi Evropian dhe për këtë, sipas saj, përgjegjëse janë politikat e qeverisë së kryeministrit Hristijan Mickoski. Ajo tha në emisionin “Noqno Studio” në 4TV se qeveria po e bllokon procesin e integrimit evropian dhe po dëmton qytetarët me mungesën e reformave dhe përplasjet politike.

Kuzeska kritikoi edhe refuzimin e propozimeve për referendum, duke thënë se vendi mund të mbetet për shumë vite jashtë BE-së. Ajo përmendi se qytetarët po përballen me rritje çmimesh dhe paga të ulëta, ndërsa sipas saj, të rinjtë po largohen nga vendi për të punuar jashtë shtetit. Gjithashtu, ajo kritikoi edhe stilin e jetesës së kryeministrit, duke përmendur orën e tij të shtrenjtë, dhe tha se politikanët nuk e ndjejnë realitetin e qytetarëve. Sipas saj, rreth 25.000 punëtorë sezonalë tashmë punojnë jashtë vendit, gjë që tregon, siç u shpreh ajo, problemet e mëdha ekonomike dhe sociale në vend.

Deputeti i VMRO-DPMNE-së, Antonio Milloshoski, ka deklaruar se partia e tij mbetet e prerë në qëndrimin se ndryshimet kushtetuese nuk duhet të ndërmerren nëse ato sjellin pasiguri të reja për shtetin dhe nuk ofrojnë garanci të qarta për anëtarësimin e plotë në Bashkimin Evropian.

Sipas tij, çdo proces i tillë duhet të bazohet në kushte të forta dhe të verifikueshme, përndryshe do të ishte një hap i gabuar për vendin. Ai theksoi se VMRO-DPMNE nuk e mbështet ndryshimin e Kushtetutës në mungesë të sigurisë për ruajtjen e identitetit kombëtar, gjuhës dhe veçorive historike të popullit maqedonas.

VMRO-DPMNE kujton gjithashtu, përmes deklarimeve të Miloshoskit, se në të kaluarën ndryshime të ngjashme kushtetuese janë prezantuar nga SDSM dhe BDI si hapa që do të sillnin përfitime dhe progres në procesin e integrimit evropian, por sipas tij, realiteti nuk i ka përmbushur pritjet.

Ai shtoi se vendi nuk duhet të hyjë sërish në një proces kushtetues pa garanci të qarta se ai do të sjellë rezultate konkrete në rrugën drejt BE-së dhe pa rrezikuar stabilitetin politik dhe identitetin shtetëror.

Ish-kryeministri dhe ish-lideri i LSDM-së, Vllado Buçkovski, vlerëson se Departamenti i Shtetit i SHBA-së “nuk interesohet më për Ballkanin Perëndimor, siç ishte rasti në 30 vitet e fundit”.

“Përfshirja e amerikanëve në ndërtimin e kombeve dhe demokracive tona ka mbaruar. Mendoj se tani ekonomia është ajo që u intereson partnerëve tanë amerikanë”, beson ai, duke dhënë një deklaratë për emisionin politiko-analitik serb “Sinteza”.

Duke folur për zgjerimin e BE-së, Buçkovski theksoi se “ata e kanë harruar Ballkanin Perëndimor dhe nëse nuk do të ishte kriza në Ukrainë, ne do të ishim jashtë interesave të Unionit”.

Sipas tij, zgjerimi duhet të jetë gjithëpërfshirës dhe thekson se nuk mund të harrojmë atë që ka bërë Maqedonia. Gazeta Flaka