Polemikat për Portokallinë, deputetja e VLEN-it degradon në sulme ndaj shtetit shqiptar

Deputetja e koalicionit VLEN, Saranda Imeri Stafaj, ka reaguar ndaj skeçit të emisionit humoristik Portokalli në Top Channel, duke bërë komente të ashpra për gjendjen sociale dhe kriminalitetin në Shqipëri.

Në reagimin e saj, deputetja shkruan:

“Çuditërisht, në një shtet ku dallimet e shtresave sociale janë aq të thella, ku brenda ditës ndodhin dhjetëra vrasje për shkaqe më banale, ku pensionisti mezi mbijeton dhe lulëzon narkotrafiku, ndërsa degjeneron shoqëria, më mirë zgjedh të jem ‘KOPUKE’.”

Megjithatë, ajo shton se pavarësisht kësaj, shqiptarët e Maqedonisë së Veriut “prapë e duan atë dhe njerëzit tanë”.

Postimin e saj deputetja e shoqëroi edhe me këngën “Rrjedh në këngë e ligjërime”, të interpretuar nga vetë ajo dhe të publikuar në profilin e saj në YouTube, i cili numëron 13 ndjekës dhe rreth 314 shikime.

Reagimi i Saranda Imeri Stafaj vjen në vazhdën e polemikave të shumta politike dhe publike pas skeçit të transmetuar në Portokalli.

Reagoi sërish Imeri – Stafaj:

Tirana zyrtare, bashkë me zgjatimet e saj mediatike dhe me kiçin e degraduar pseudo-artistik që e ndjek pas, kurrë në historinë politike të pluralizmit shqiptar nuk ka qenë më armiqësore ndaj shqiptarëve të Maqedonisë së Veriut sesa sot.

Deri dje kemi parë një Tiranë indiferente ndaj fatit tonë politik e kombëtar. Edhe atëherë kur na kanë vrarë, arrestuar nënat e motrat tona pa faj, kanër kurdisur raste të montuara, etj.

Sot po shohim një Tiranë agresive, përçarëse dhe hapur destruktive ndaj vullnetit politik të shqiptarëve në Maqedoninë e Veriut.
Dhe e gjithë kjo ndodh në një moment kur nuk ekziston asnjë fakt, asnjë argument dhe asnjë dëshmi për shtypje të gjuhës, kulturës apo identitetit shqiptar në vendin tonë.

Por Tirana zyrtare nuk ndërhyn në Shkup për të mbrojtur shqiptarët.

Ajo ndërhyn për të mbrojtur një kastë politike të korruptuar dhe të kriminalizuar, me të cilën ndërtoi projektin famëkeq të “Ballkanit të Hapur” dhe me të cilën e lidhin interesa të errëta oligarkike, financiare dhe kriminale.

Një kastë politike, figurat kryesore të së cilës sot gjenden në listën e zezë amerikane, në arrati, në burg ose nën hetime për korrupsion masiv, shpërdorim të pushtetit dhe lidhje me krimin e organizuar.
Dhe është tragjike që Tirana zyrtare, në vend se të qëndrojë pranë shqiptarëve të Maqedonisë së Veriut, është shndërruar në avokate e të vjetrës kriminale.

Gazeta Flaka