Ramush Haradinaj: “Shqipja nuk është opsionale” – mbështetje për studentët shqiptarë

Lideri i Aleanca për Ardhmërinë e Kosovës, Ramush Haradinaj, ka shprehur mbështetje të fuqishme për protestën e studentëve shqiptarë në Maqedoninë e Veriut, duke theksuar se gjuha shqipe është e drejtë kushtetuese dhe pjesë e identitetit autokton të shqiptarëve në këtë vend.

Në reagimin e tij publik, Haradinaj deklaroi se shqipja nuk mund të trajtohet si çështje opsionale.

“Gjuha shqipe në Maqedoninë e Veriut nuk është opsionale. Është gjuhë autoktone, gjuhë e këtij trualli, që nuk kanë mundur ta ndalin as kralat e as sulltanët”, shkroi ai.

Ai theksoi se gjuha shqipe ka mbijetuar ndër breza përmes familjes, shkollës, këngës dhe sakrificës së shqiptarëve.

“Ajo ka mbijetuar brez pas brezi, në familje, në shkolla, në këngë e në sakrifica”, u shpreh Haradinaj.

Sipas tij, përdorimi i shqipes është i garantuar me Kushtetutë dhe me të drejtën e patjetërsueshme të shqiptarëve për të jetuar e studiuar në gjuhën e tyre amtare.

“Shqipja është e garantuar me Kushtetutë dhe me të drejtën e patjetërsueshme të çdo shqiptari për të folur shqip në vendin e vet, për të studiuar shqip, për të shkruar, menduar dhe për të marrë frymë shqip pa frikë e pa kompromis”, deklaroi lideri i AAK-së.

Haradinaj shtoi se studentët shqiptarë nuk po kërkojnë privilegje, por dinjitet dhe barazi.

“Studentët shqiptarë sot nuk po kërkojnë privilegje, po kërkojnë dinjitet, barazi dhe respekt për identitetin e tyre”, theksoi ai.

Në fund të mesazhit të tij, Ramush Haradinaj shprehu solidaritet të plotë me studentët shqiptarë në Maqedoninë e Veriut:

“Me zemër, me shpirt dhe me krenari jam me ju nesër, studentë shqiptarë në Maqedoninë e Veriut. Zëri juaj është zëri i çdo shqiptari që nuk pranon të heshtë përballë padrejtësisë.” Gazeta Flaka