Trotineti elektrik i mori jetën 13-vjeçarit? Tragjedia që rikthen debatin për sigurinë në trafik

Një ngjarje e rëndë ka tronditur Kumanovën, pasi 13-vjeçari Agan Asani ka humbur jetën si pasojë e një aksidenti në komunikacion. Sipas informacioneve shtesë të bëra publike nga policia, i riu ka ndërruar jetë pasi është goditur nga një veturë teksa po lëvizte me trotinet elektrik.

Nga Ministria e Punëve të Brendshme njoftojnë se shoferi i automjetit është privuar nga liria dhe se po zhvillohen procedurat për zbardhjen e plotë të rastit dhe përcaktimin e përgjegjësive.

““Më 28.05.2026 rreth orës 21:10 në Sektorin për Punë të Brendshme (SVR) Kumanovë është raportuar se në rrugën rajonale Kumanovë–Shkup, në fshatin Çerkez të Kumanovës, ka ndodhur një aksident trafiku mes një automjeti pasagjerësh “Mercedes” me targa të Kumanovës, i drejtuar nga F.S. (24) nga Kumanova, dhe një trotineti elektrik të drejtuar nga një i mitur 13-vjeçar nga fshati Çerkez. Pas aksidentit, i mituri është transportuar në Spitalin e Përgjithshëm të Kumanovës, ku mjeku ka konstatuar vdekjen e tij. Në orën 21:20 në Stacionin Policor të Kumanovës, drejtuesi i automjetit është privuar nga liria. Është kryer kontroll në vendin e ngjarjes nga prokurori publik dhe ekipi hetimor i SPB-Kumanovë”, thonë nga MPB.

Rasti ka rikthyer në vëmendje debatin mbi sigurinë e trotineteve elektrike, të cilat vitet e fundit janë shndërruar në një trend në rritje, jo vetëm në Maqedoninë e Veriut, por edhe në shumë vende të botës. Për shkak të përdorimit gjithnjë e më të madh nga të rinjtë dhe fëmijët, ekspertët vazhdimisht paralajmërojnë për rreziqet që lidhen me mungesën e infrastrukturës së dedikuar, shpejtësinë relativisht të lartë, dukshmërinë e ulët në trafik dhe mungesën e pajisjeve mbrojtëse.

Në shumë raste, trotinetet elektrike përdoren në rrugë të ngarkuara, trotuare apo kryqëzime ku përdoruesit mbeten më të ekspozuar ndaj aksidenteve. Veçanërisht shqetësues mbetet përdorimi i tyre nga të miturit, shpesh pa pajisje mbrojtëse dhe pa njohuri të mjaftueshme për rregullat e komunikacionit.

Ngjarja tragjike në Kumanovë hap sërish pyetje mbi nevojën për rregulla më të qarta, kontroll më të madh institucional dhe ndërgjegjësim më të lartë për sigurinë në komunikacion, në një kohë kur trotinetet elektrike po bëhen pjesë e përditshmërisë urbane. Gazeta Flaka