Yllka Nuredini: Po qarkullojnë akuza të pavërteta, as nuk më ndalojnë, as nuk më trembin

Yllka Nuredini ka reaguar ndaj akuzave publike për nepotizëm dhe punësimin e motrës së saj në Ministrinë e Shëndetësisë, duke i cilësuar ato si shpifje dhe fyerje personale.

“Po qarkullojnë akuza të pavërteta, të shoqëruara me fyerje të ulëta mbi mua dhe familjen time, për gjoja ‘punësimin e motrës sime’. E para, nuk kam pasur dhe nuk kam asnjë kompetencë vendimmarrëse për punësime. Kurrefarë! E dyta, është e turpshme që ish-miq, me të cilët kemi ndarë bukën e gojës, sot për interesa të ngushta politike, hedhin baltë mbi mua dhe familjen time,” tha ajo.

Nuredini sqaroi se angazhimi i motrës së saj në Ministrinë e Shëndetësisë ishte i përkohshëm dhe i ligjshëm.

“Motra ime ka ndihmuar vetëm 1 muaj e gjysmë në Ministrinë e Shëndetësisë, në një periudhë tranzicioni kur institucioni ishte i paralizuar nga katrahura e ministrit paraprak. Ajo ishte e angazhuar për punë thjesht administrative-përkthyese, me kontratë modeste dhe në përputhje të plotë me ligjin. As nuk ka keqpërdorur mjete, as nuk ka marrë privilegje, asgjë!” theksoi Nuredini.

Ajo iu referua edhe sakrificave të familjes së saj, duke mohuar çdo lidhje me favore politike.

“Unë dhe motra ime kemi nisur punën që në adoleshencë. Asnjëherë nuk kemi pritur favore politike, as mbështetje të fshehtë. Përkundrazi, partia që i dilni zot sot, i la prindërit e mi pa punë gjithë jetën e tyre. Babai im është i vetmi aktor dhe regjisor profesionist që jeton e vepron në Dibër, me mbi 30 vite kontribut në kulturën shqiptare. Mos e përdorni emrin e tij për të baltosur punën dhe sakrificat tona,” u shpreh ajo.

Në fund, Nuredini i drejtoi një mesazh të qartë kundërshtarëve politikë.

“Portalet që menaxhon partia juaj i ushqen me shpifje, të cilave më pas ju u bëni jehonë si të tërbuar. Duhet ta kuptojnë një gjë: as nuk më ndalojnë, as nuk më trembin të them atë që mendoj dhe ndjej. Kujdes me fjalët dhe shpifjet. Unë e di çfarë kam bërë, e di kush jam dhe mbi të gjitha, e di çfarë nuk jeni ju,” përfundoi ajo.