BDI-Çair: Thellohet skandali me ndërtimet pa leje – procedurat anulohen, objektet mbeten

Dega e Bashkimit Demokratik për Integrim në Çair ka reaguar sërish për çështjen e ndërtimeve pa leje, duke theksuar se situata po përkeqësohet për shkak të mungesës së veprimit konkret institucional.

Sipas këtij subjekti, edhe gjatë ditës së djeshme është anuluar procedura e prokurimit për angazhimin e një kompanie që do të kryente rrënimin e objekteve pa leje. Nga BDI-Çair thonë se kjo nuk është hera e parë, por një praktikë që po përsëritet, ku procedurat shpallen, shtyhen dhe më pas anulohen.

Në reagim thuhet se ndërkohë, në terren, ndërtesat shumëkatëshe pa leje dhe pa infrastrukturë përkatëse, si parkingjet, vazhdojnë të mbeten të paprekura, duke krijuar një hendek të madh mes vendimeve në letër dhe realitetit në praktikë.

BDI-Çair thekson se mungesa e kontrollit në fazat e hershme të ndërtimit është një nga problemet kyçe. Sipas tyre, pa inspektime të vazhdueshme dhe ndërhyrje në kohë, çdo përpjekje e mëvonshme për rrënim mbetet joefektive.

Ata paralajmërojnë se kjo situatë po sjell pasoja të drejtpërdrejta për qytetarët, përfshirë mbingarkesën urbane, rritjen e rrezikut për sigurinë dhe degradimin e hapësirave publike.

Në reagimin e tyre, ata akuzojnë kryetarin e komunës se, siç thuhet, po favorizon interesa të caktuara në fushën e ndërtimit, duke rënduar jetën e banorëve të Çairit.

Nga BDI-Çair kërkojnë vendosjen e rendit urban, rritjen e sigurisë dhe zbatim të barabartë të ligjit për të gjithë qytetarët. Gazeta Flaka