Hristijan Mickoski në Budapest, LSDM ngre dyshime për marrëveshje të fshehta

Kryeministri Hristijan Mickoski ndodhet në Budapest për takime dhe bisedime mbi bashkëpunimin ekonomik dhe investimet e reja. Opozita, LSDM, kritikon vizitën duke hedhur dyshime për marrëveshje të mundshme të fshehta pas dyerve të mbyllura. Një delegacion qeveritar i udhëhequr nga kryeministri Mickoski po qëndron për një vizitë zyrtare në Hungari.

Gjatë kësaj vizite, ai zhvilloi një takim me kryeministrin hungarez Viktor Orban dhe mori pjesë në një forum ekonomik në Budapest. Në këto takime u paralajmërua forcimi i bashkëpunimit ekonomik, investime të reja dhe projekte me përfitime potenciale për të dyja vendet.

Kryeministri Mickoski theksoi se “Maqedonia dhe Hungaria po ndërtojnë një partneritet të fortë strategjik”, duke nënvizuar mbështetjen e ndërsjellë, respektin dhe vlerat e përbashkëta.

Opozita, LSDM, po e ndjek me kujdes këtë vizitë, duke kujtuar se në Budapest jeton ish-kryeministri Nikola Gruevski pas arratisjes së tij nga Maqedonia. Nga kjo parti shprehen dyshime për marrëveshje të mundshme të arritura larg syve të publikut.

Takimi Mickoski–Orban: Ekonomi, investime dhe stabilitet rajonal

Mickoski udhëtoi drejt Budapestit pasi mori pjesë të dielën në fillimin e punimeve për rikonstruksionin e aeroportit të Ohrit. Aty ai paralajmëroi rikthimin e linjës ajrore Shkup–Budapest, si një hap të rëndësishëm për përmirësimin e lidhjeve rajonale, zhvillimin e turizmit dhe bashkëpunimin ekonomik.

Të hënën, ai u takua me kryeministrin hungarez Viktor Orban. Sipas njoftimit të Qeverisë, bisedimet u zhvilluan në një atmosferë konstruktive dhe miqësore.

Fokusimi kryesor ishte te thellimi i bashkëpunimit ekonomik, tërheqja e investimeve, rritja e shkëmbimit tregtar, si dhe projektet në infrastrukturë dhe energjetikë. Në takim u riafirmua mbështetja për integrimin evropian të Maqedonisë, duke theksuar rëndësinë e sistemit të meritës dhe qasjes parimore.

Gjatë vizitës, Mickoski foli edhe në një aktivitet të organizuar nga “Mathias Corvinus Collegium”, ku diskutoi mbi rëndësinë e lidershipit dhe vizionit në kohë sfidash globale.

Ai e cilësoi Hungarinë dhe lidershipin e Orbanit si shembull të një shteti të suksesshëm. Para komunitetit të biznesit, kryeministri përcolli mesazhin se Maqedonia është e hapur për partneritete të reja, duke ofruar pozitën e saj strategjike dhe fuqi punëtore të kualifikuar.

Vizitë në prag të zgjedhjeve në Hungari
Vizita e Mickoskit vjen përpara zgjedhjeve në Hungari, të cilat do të mbahen më 12 prill. Orban, kryeministri me mandatin më të gjatë në Bashkimin Evropian, po garon për një mandat tjetër.

Nga LSDM shprehen se mbështetja për Orbanin është në rënie dhe se Mickoski po lidhet me modele politike që BE-ja nuk i toleron më.

Ata e akuzojnë atë për politika izolacioniste, korrupsion, veprim në interes të palëve të treta dhe për marrëveshje të mundshme që synojnë kthimin e Nikola Gruevskit.

Gjithashtu, LSDM ngre pyetjen se çfarë do të ndodhë me mediat dhe kompanitë në Maqedoni që kanë lidhje me interesat hungareze — veçanërisht në sektorët e energjisë dhe telekomunikacionit — në rast se Orban humbet pushtetin.