Gostivar, fokus në rininë: Limani thekson përfshirjen në vendimmarrje

Kryetari i Komunës së Gostivarit, Valbon Limani, njoftoi se sot në Gostivar janë mirëpritur përfaqësues nga komunat e Rajonit të Pollogut, Zyra Rajonale për Bashkëpunim Rinor (RYCO), organizata rinore dhe aktivistë.

Aktiviteti u zhvillua në kuadër të projektit “Youth Connect: Building Inclusive Participation Through Local Partnerships”, i mbështetur nga RYCO dhe i implementuar nga organizata HERA.

“Sot patëm kënaqësinë të mirëpresim në Gostivar përfaqësues nga komunat e Rajonit të Pollogut, Zyrës Rajonale për Bashkëpunim Rinor (RYCO), organizatat rinore, si dhe aktivistë të ndryshëm”, deklaroi Limani.

Ai theksoi se roli i të rinjve është thelbësor në proceset vendimmarrëse. “Rininë e konsiderojmë partner të barabartë në proceset vendimmarrëse, andaj përmes bashkëpunimit ndërkomunal dhe mekanizmave konkretë, po ndërtojmë politika që u japin zë dhe mundësi reale të rinjve”, u shpreh ai.

Sipas tij, Gostivari renditet ndër komunat e pakta që përmbushin kriteret ligjore për pjesëmarrje rinore. “Gostivari mbetet ndër komunat e pakta që përmbushin të gjitha kriteret e parapara nga Ligji për pjesëmarrje rinore dhe politika rinore”, theksoi Limani.

Ai shtoi se komuna do të vazhdojë me përkushtim në këtë drejtim. “Komuna e Gostivarit mbetet e përkushtuar në fuqizimin e rinisë përmes Këshillit Lokal Rinor, qendrave rinore, strategjive konkrete dhe krijimit të hapësirave të dedikuara për zhvillimin e tyre”, përfundoi ai. Gazeta Flaka