Zgjedhjet e paralajmëruara ndezin BDI-në: Aktivistët nisin fushatën “Ai po vjen”

Kryeministri i Maqedonisë së Veriut, Hristijan Mickoski, ka paralajmëruar se vendi mund të shkojë shumë shpejt në zgjedhje parlamentare, duke nxitur reagime të menjëhershme në skenën politike.

Duke komentuar deklaratën e kryetarit të LSDM-së, Venko Filipçe, se Bullgaria nuk po konteston identitetin maqedonas dhe se kryeministri po krijon “armiq artificialë”, Mickoski u shpreh i bindur se pas zgjedhjeve do të ketë ndryshime të mëdha në kampin opozitar.

“Lajmi i mirë është se shumë shpejt do të ketë zgjedhje. Pas atyre zgjedhjeve partia që ai udhëheq do të margjinalizohet. Dhe unë mendoj se ai dhe persona të ngjashëm si ai do të largohen nga politika dhe do të vijnë njerëz që e duan vendin”, deklaroi Mickoski.

Ai akuzoi opozitën se po vepron në kundërshtim me interesat shtetërore.

“Më vjen keq që opozita përsëri filloi të gjunjëzohet ndaj interesave të vendeve të huaja, në vend që të qëndrojë krah për krah me qeverinë në mbrojtje të interesave të vendit”, tha kryeministri.

Menjëherë pas kësaj deklarate reagoi kreu i Bashkimit Demokratik për Integrim, Ali Ahmeti, i cili tha se është i gatshëm për zgjedhje të parakohshme në çdo moment.

“Unë kam kërkuar që në ditën e parë zgjedhje të parakohshme, por s’është befasi. Nesër po të ketë zgjedhje, jam i gatshëm sigurisht”, deklaroi Ahmeti para mediave.

Paralelisht, aktivistët e BDI-së kanë intensifikuar aktivitetin në rrjetet sociale, duke shpërndarë mesazhin “Ai po vjen”, të shoqëruar me fotografi të liderit të tyre, Ali Ahmeti.

Reagim pati edhe nga ministri i Politikës Sociale, Demografisë dhe Rinisë, Fatmir Limani, i cili së fundmi është konsideruar si zë kritik brenda koalicionit VLEN.

Pas deklaratës së Mickoskit, Limani ndau në rrjetet sociale një postim nga profili “Zahir Pajaziti”, ku shfaqej fotografia e kryeministrit me mbishkrimin: “Zgjedhjet parlamentare do të mbahen së shpejti”.

Ndërkohë, nga koalicioni VLEN deri më tani nuk ka pasur qëndrim zyrtar lidhur me paralajmërimet për zgjedhje të reja parlamentare, duke e lënë të hapur dilemat mbi qëndrimin e tyre për zhvillimet e fundit politike. Gazeta Flaka