VLEN i del në mbrojte Mexhitit për nepotizmin: Nuk është ashtu!

VLEN i është kundërpërgjigjur ashpër akuzave të BDI-së ndaj Izet Mexhiti, duke i cilësuar si “film i vjetër” dhe retorikë e konsumuar politike.

Në reagimin e tyre, nga VLEN thonë se sulmet e BDI-së janë dëshmi e qartë se i “dhemb” Mexhiti, pasi – sipas tyre – ai bashkë me votën qytetare i ka çuar në opozitë. Ata theksojnë se Mexhiti nuk është produkt i strukturave të mbyllura partiake apo i përkrahjes nga Ali Ahmeti, por një figurë që ka marrë legjitimitet direkt nga qytetarët përmes zgjedhjeve.

VLEN bën krahasim të drejtpërdrejtë me emra të njohur të BDI-së si Bujar Osmani, Blerim Bexheti dhe Fatmir Besimi, duke i akuzuar për një kulturë politike të bazuar në poste, tenderë dhe rehati personale, larg kontaktit me qytetarët.

Sipas tyre, dallimi është i qartë: Mexhiti përfaqëson terrenin dhe komunikimin me njerëzit, ndërsa drejtuesit e BDI-së janë identifikuar me zyrat, pushtetin ekzekutiv dhe pazaret politike.

VLEN shkon më tej duke akuzuar se BDI është kapur nga një rreth i ngushtë rreth Ahmetit, që – sipas tyre – ka privatizuar partinë dhe përdor aktivistët vetëm si mjet për rikthim në pushtet.

Në reagim përmenden edhe “rekordet” e funksioneve publike, duke theksuar se Osmani ka mbi 3.700 ditë në poste ministrore, ndërsa Bexheti mbi 5.500 ditë në funksione shtetërore, duke e quajtur këtë si dëshmi të konsumimit politik.

Në fund, VLEN akuzon BDI-në për demagogji dhe për një qasje ku qytetari shihet vetëm si votë, ndërsa pushteti si privilegj i trashëgueshëm. Ata shtojnë se kjo qasje nuk funksionon më dhe se elektorati tashmë e ka “lexuar” këtë model politik.Gazeta Flaka