Arta Toçi ironizon deputeten e VLEN-it: Çka do thoshte po të shkruante më gjatë?

Deputetja e koalicionit VLEN, Imerlije Saliu, ka reaguar lidhur me debatet e fundit për skeçin e emisionit humoristik Portokalli dhe komentet ndaj shqiptarëve të Maqedonisë së Veriut.

Saliu tha se shqiptarët e Maqedonisë së Veriut e duan Shqipërinë “pa kushte”, pavarësisht rasteve kur, sipas saj, identiteti i tyre “nuk trajtohet siç duhet” apo kur etiketohen me terma fyes.

“Ne shqiptarët e Republikës së Maqedonisë së Veriut e duam shumë Shqipërinë. E duam edhe kur ‘identiteti ynë nuk trajtohet siç duhet’ edhe kur na thërrasin ‘kopuka’ e ‘idiot’”, ka shkruar ajo.

Deputetja shtoi se shqiptarët në RMV janë rritur me humorin dhe satirën e aktorëve të Portokalli, por apeloi që shqiptarët të mos ndahen sipas përkatësisë politike.

“Mos na ndani sipas përkatësisë politike. Ne kemi një komb, një gjuhë dhe shumë më tepër gjëra që na bashkojnë sesa që na ndajnë”, theksoi Saliu.

Ajo pati edhe dy mesazhe për klasën politike në Shqipëri:

“Mësojini vëllezërit tanë të na thërrasin shqiptarë kur vijmë për vizitë në Shqipëri, jo me etiketime që na mohojnë identitetin.” dhe “Mos i politizoni studentët. Populizmi nuk i ka sjellë dobi askujt.”

Pas kësaj deklarate reagoi edhe Arta Toçi, e cila akuzoi deputeten për kundërthënie në qëndrimet e saj.

“Vetëm në një postim të shkurtër në FB, deputetja e VLEN del me dy qëndrime: kërkon nga Shqipëria të mos ndërhyjë në punët e brendshme të Maqedonisë së Veriut dhe i quan studentët shqiptarë të manipuluar nga Shqipëria”, shkroi Toçi.

Ajo ironizoi më tej duke shtuar:

“Merreni me mend çka do kishte thënë kjo nëse do kishte shkruar pak më gjatë!” Gazeta Flaka