Reagon këshilltarja e ASH-së në Kërçovë: Injorim për kulturën shqiptare

Këshilltarja komunale dhe njëherësh kryetare e Asamblesë së Gruas të Aleancës për Shqiptarët në Kërçovë, Syarta Saliju Osmani, ka reaguar ashpër ndaj mënyrës së ndarjes së mjeteve buxhetore në Komunën e Kërçovës, duke akuzuar pushtetin lokal për nënçmim të kulturës shqiptare.

Sipas saj, komuna ka ndarë 1.800.000 denarë për organizimin e pritjes së Vitit të Ri, ndërsa projektet kulturore shqiptare, siç thotë ajo, ose janë lënë me “thërrime qesharake”, ose nuk janë mbështetur fare.

“Asgjë e re: Nënçmimi në Kërçovë vazhdon, sepse heshtja e VLEN u ka dhënë guxim”, shkruan Saliju Osmani në reagimin e saj publik.

Ajo kritikon faktin që, sipas saj, investohet në “spektakël që harrohet brenda natës”, ndërsa lihet anash kultura shqiptare që “mban gjallë identitetin e një populli”.

“Mesaduket, kultura shqiptare nuk paska vlerë sa një natë fishekzjarresh, disa këngë festive dhe disa orë dekor”, thekson ajo.

Në cilësinë e këshilltares komunale, Saliju Osmani i drejtohet publikisht kryetarit të komunës me mesazhin se kultura shqiptare nuk mbahet gjallë me “premtime parazgjedhore e heshtje pas fitores”, por me mbështetje reale dhe konkrete.

“Të nderuar bashkëqytetarë, unë nuk pres – mos prisni as ju respekt për kulturën shqiptare nga ata që e kujtojnë vetëm në fushata”, përfundon reagimi i saj. Gazeta Flaka