Valbon Limani në Forumin “Përtej Kufijve”: Korridori VIII është boshti i zhvillimit rajonal

Kryetari i Gostivarit, Valbon Limani panelist në Forumin e Biznesit Maqedoni e Veriut – Shqipëri “Përtej Kufijve”; Korridori VIII aks i zhvillimit dhe integrimit rajonal

Kryetari i Komunës së Gostivarit, Valbon Limani, mori pjesë si panelist në Forumin e Biznesit Maqedoni e Veriut – Shqipëri “Përtej Kufijve”, organizuar nga Ambasada e Republikës së Shqipërisë në Maqedoninë e Veriut dhe Oda Ekonomike e Maqedonisë së Veriut.

Në fjalimin e tij, Limani theksoi rëndësinë strategjike të Korridorit VIII për zhvillimin ekonomik, integrimin rajonal dhe përmirësimin e infrastrukturës në rajon, duke nënvizuar se ky korridor nuk është vetëm projekt transporti, por një platformë zhvillimi dhe stabiliteti afatgjatë.

Ai potencoi se punimet në aksin Tetovë–Gostivar dhe Gostivar–Bukojçan tashmë kanë sjellë përfitime konkrete për qytetarët përmes hapjes së vendeve të reja të punës dhe gjallërimit ekonomik, ndërsa në të ardhmen pritet ndikim i madh në zhvillimin e turizmit, rritjen e sigurisë energjetike dhe lehtësimin e qarkullimit të mallrave dhe njerëzve.

Kryetari Limani vlerësoi gjithashtu angazhimin e Republikës së Shqipërisë për realizimin e Korridorit VIII dhe rëndësinë e portit të ri të Porto Romanos në Durrës, duke theksuar se ky projekt do të krijojë mundësi të reja ekonomike dhe dalje më konkurruese drejt detit për Maqedoninë e Veriut dhe rajonin.

Në fund, ai theksoi se Komuna e Gostivarit mbetet e përkushtuar që zhvillimi i Korridorit VIII të ecë paralelisht me mbrojtjen e mjedisit, rritjen e sigurisë rrugore dhe krijimin e vlerës së shtuar reale për qytetarët.