Takimi Ahmeti–Vengu, në fokus stabiliteti rajonal dhe çështja kombëtare shqiptare

Ali Ahmeti ka njoftuar për takimin me Pirro Vengu, të cilin e cilësoi si një personalitet që mishëron përkushtimin ndaj shtetit dhe interesit kombëtar.

“Ishte kënaqësi e veçantë të mirëprisja Pirro Vengu, ish-Ministër i Mbrojtjes së Republikës së Shqipërisë dhe deputet i Kuvendit, një personalitet që mishëron përkushtimin ndaj shtetit dhe interesit kombëtar”, ka shkruar Ahmeti.

Sipas tij, gjatë takimit është zhvilluar një bisedë mbi sfidat me të cilat përballen shqiptarët, zhvillimet rajonale dhe rëndësinë e bashkëpunimit mbarëkombëtar.

“Në një frymë të sinqertë vëllazërore dhe përgjegjësie ndaj së ardhmes sonë, zhvilluam një bisedë të thellë mbi sfidat që përballen shqiptarët sot, zhvillimet në rajon dhe domosdoshmërinë e forcimit të bashkëpunimit mbarëkombëtar si shtyllë kyçe për stabilitetin, integrimin evropian dhe fuqizimin e zërit tonë në arenën ndërkombëtare”, theksoi Ahmeti.

Ai bëri të ditur se gjatë takimit ka pranuar si dhuratë librin Princa të Lilit, bij të Arbërit, familjarë të Sulltanit të autorit Thomas Frashëri.

“Me mirënjohje të veçantë pranova si dhuratë librin ‘Princa të Lilit, bij të Arbërit, familjarë të Sulltanit’ të autorit Thomas Frashëri, një vepër me peshë historike e shpirt kombëtar”, u shpreh Ahmeti.

Në fund, ai vlerësoi se takime të tilla janë dëshmi e unitetit dhe përkushtimit për një të ardhme më të sigurt dhe më dinjitoze për shqiptarët.

“Takime të tilla nuk janë thjesht shkëmbime mendimesh, ato janë dëshmi e gjallë e unitetit, e lidhjeve të forta dhe e përkushtimit të përbashkët për një të ardhme më të drejtë, më të sigurt dhe më dinjitoze për kombin shqiptar”, përfundoi Ahmeti. Gazeta Flaka