EVN Maqedoni vendosi në funksion sistemin e parë baterik për ruajtjen e energjisë

EVN Maqedoni vendosi në funksion sistemin e parë baterik për ruajtjen e energjisë elektrike (Battery Energy Storage System – BESS), i instaluar në kuadër të centralit fotovoltaik “Probishtip”. Me fuqi të instaluar prej 10 MW dhe kapacitet prej 20 MWh, sistemi paraqet kapacitetin më të madh baterik në kuadër të të gjithë EVN Grupacionit, ndërsa njëkohësisht e bën kompaninë pronare dhe operatore të sistemit më të madh të licencuar baterik në vend. Integrimi i kësaj teknologjie mundëson që energjia diellore e prodhuar gjatë ditës të ruhet dhe të përdoret në periudhën më të përshtatshme, duke kontribuar në stabilitet më të madh, fleksibilitet dhe efikasitet të sistemit energjetik.

Me rastin e vënies në përdorim të sistemit baterik, lokacionin e vizituan anëtarët e Bordit Drejtues të EVN
Maqedoni, menaxherët e kompanive përbrenda EVN, përfaqësues të Komunës së Probishtipit, profesorë
eminentë nga Fakulteti i Elektroteknikës dhe Teknologjive Informatike, si dhe përfaqësues të kompanisë
realizuese Intebako.

Gjatë vizitës, të pranishmëve iu drejtua Kryetari i Bordit Drejtues të EVN Maqedoni, z. Vollfgang Maier.
“Sot qëndrojmë para arritjes tonë më të re – sistemit baterik për ruajtjen e energjisë, të vendosur në
centralin fotovoltaik ‘Probishtip’. Bëhet fjalë për një nga projektet udhëheqëse në fushën e burimeve të
ripërtëritshme të energjisë dhe për sistemin më të madh baterik në kuadër të të gjithë Grupacionit EVN
dhe në vend. Së shpejti, kapaciteti i sistemit do të dyfishohet në 40 MWh. Pajisjet tashmë janë dorëzuar
dhe ndodhen në fazë instalimi”, theksoi z. Maier.

Sistemi baterik është realizuar me teknologjinë moderne LiFePO4 (LFP), me jetëgjatësi stabile pune prej
rreth 10 vitesh, përkatësisht 10.000 cikle pune. Sistemi përbëhet nga disa kontejnerë baterikë dhe PCS,
të vendosur në një sipërfaqe prej rreth 580 metrash katrorë. Bateritë janë prodhuar nga CATL, një nga
liderët botërorë në industrinë e baterive, ndërsa sistemi për konvertimin e energjisë është siguruar nga K
Star. Pas një procesi intensiv të përgatitjes dhe realizimit, projekti u licencua zyrtarisht më 9 prill 2026.