VLEN në panik nga protesta studentore? Një ditë para protestës premtojnë zgjidhje për shqipen

Pesë në 12. Liderët e VLEN-it, në sinkronizim të plotë, ndajnë të njëjtin mesazh në rrjetet sociale: “Provimi i jurisprudencës edhe në gjuhën shqipe! Së shpejti me lajme të mira.”

Premtimi vjen vetëm një ditë para protestës studentore të paralajmëruar për të hënën në Shkup — protestë që tashmë ka marrë jehonë të madhe publike dhe mbështetje masive nga shqiptarët në Maqedoninë e Veriut, por edhe nga Shqipëria e Kosova.

Pikërisht kjo valë reagimesh duket se ka shtyrë qeverinë dhe VLEN-in të reagojnë në moment të fundit, në përpjekje për të ulur presionin publik.

Analisti Sefer Selimi reagoi ashpër ndaj paralajmërimit të VLEN-it:

“Nga Komisioni i Venecias? Nga Mickoski? Nga kush lajme të mira? Mos tallni trapin edhe ju si Fillkovi e Mickoski. Zbatoni Ligjin për përdorimin e gjuhëve. Aq. Kjo nuk është më çështje vetëm e jurisprudencës, por për çdo provim e çdo të drejtë ku shqipja duhet të frymojë, sipas Kushtetutës dhe Ligjit!”

Edhe gazetari Driton Zenku ngre pikëpyetje serioze mbi besueshmërinë e premtimeve të VLEN-it, duke rikujtuar një seri zotimesh të pambajtura ose të zvarritura:

– ndryshimet kushtetuese brenda gjashtë muajve dhe zhbllokimi i integrimeve europiane;
– ligji për përfaqësim adekuat, që po zvarritet prej dy vitesh;
– premtimi për mbylljen e kazinove, që jo vetëm nuk ndodhi, por me ligjin e ri praktikisht u vulos mosmbyllja e tyre;
– 10 mijë euro për çdo familje;
– heqja e “20%-shit”;
– dhe shumë premtime të tjera që ende nuk kanë marrë zgjidhje konkrete.

Në këtë klimë mosbesimi, shumë studentë dhe qytetarë e shohin paralajmërimin e fundit jo si zgjidhje reale, por si reagim të nxituar politik për të amortizuar protestën që po afrohet. Gazeta Flaka