“Foli shqip o Taj” – Selmani rikujton nisjen e lëvizjes studentore

Aktivistja qytetare Nafie Selmani ka reaguar lidhur me valën e madhe të mbështetjes mbarëkombëtare për protestën e studentëve shqiptarë në Maqedoninë e Veriut, duke e cilësuar atë si një moment bashkimi kombëtar rreth gjuhës shqipe dhe të drejtave të studentëve.

Në reagimin e saj publik, Selmani shprehet e emocionuar nga solidariteti i figurave publike nga të gjitha trojet shqiptare.

“Jam e mahnitur dhe zemra mal teksa po lexoj gjithë këtë përkrahje mbarëkombëtare për studentët nesër. Artistë, sportistë, shkrimtarë, profesorë, aktivistë e figura politike nga të gjitha trojet po bëhen zëri i tyre”, deklaroi ajo.

Ajo rikujtoi fillimet e lëvizjes studentore dhe sloganin që, sipas saj, simbolizoi revoltën për gjuhën shqipe.

“Kur studentët e nisën betejën e tyre me thirrjen ‘Foli shqip o Taj’ ishim pak që iu bashkuam atyre. Sot jemi bërë shumë. Nesër do të bëhemi edhe më shumë”, u shpreh Selmani.

Sipas saj, kauzat e drejta arrijnë gjithmonë të fitojnë mbështetje qytetare dhe morale.

“Sepse kauzat e drejta nuk mbeten kurrë vetëm, ato gjejnë rrugën drejt zemrave të njerëzve”, theksoi Nafie Selmani.

Ajo vlerësoi faktin që studentët kanë kërkuar bashkim dhe jo përçarje politike apo ideologjike.

“Studentët nuk kërkuan përçarje, por mbështetje, kërkuan bashkim. Dhe pikërisht për këtë sot po bashkojnë njerëz nga çdo anë, pa dallime politike, ideologjike apo profesionale”, deklaroi ajo.

Në fund të reagimit të saj, Selmani kishte edhe një thirrje për koalicionin VLEN dhe për Albin Kurti.

“Dua të besoj se deri nesër edhe VLEN-it dhe VV-Albin Kurti do t’u rrahë damari shqip, dhe do ta dëgjojnë zërin e studentëve dhe nuk do të heshtin si deri më sot. Heshtja përballë rinisë që kërkon të drejtat e veta nuk i bën nder askujt”, përfundoi ajo. Gazeta Flaka