Selami Kolonja: “Me studentët, gjithmonë!” – mbështetje për kauzën studentore në Shkup

Profesori universitar dhe këngëtari nga Struga, Selami Kolonja, ka shprehur mbështetje të plotë për studentët shqiptarë në Maqedoninë e Veriut, në prag të protestës së paralajmëruar në Shkup.

Në reagimin e tij publik, Kolonja thekson se përkrahja e studentëve është një obligim moral dhe shoqëror.

“Me studentët, gjithmonë! Sot, më shumë se kurrë, e ndiej obligim moral të jem me zërin dhe frymën studentore!”, deklaroi ai.

Ai kujtoi përvojën e tij shumëvjeçare me rininë universitare, duke theksuar rëndësinë e dëgjimit të zërit studentor kur bëhet fjalë për kauza të drejta.

“Që nga viti 1995 punoj me rininë universitare dhe e di mirë se kur ata ngrihen për dinjitetin e tyre akademik, nuk duhen paragjykuar, por dëgjuar me kujdesin më të veçantë”, u shpreh Selami Kolonja.

Ai kritikoi faktin që, sipas tij, studentët mund të mos kenë të drejtë të japin provime profesionale në gjuhën në të cilën janë formuar.

“Është absurd që studenti të mos ketë të drejtë ta japë provimin profesional në gjuhën në të cilën ka studiuar, ka mësuar dhe është formuar për vite të tëra”, theksoi ai.

Kolonja vlerësoi studentët si zërin më të pastër të shoqërisë dhe të ardhmen e vendit.

“Ata nuk po kërkojnë privilegj — po kërkojnë të drejtën e tyre bazike, barazi dhe respekt”, deklaroi ai.

Në fund, ai shprehu mbështetje të vazhdueshme për rininë studentore.

“Kam qenë, jam dhe do të jem në përkrahje të studentëve dhe të çdo të riu që kërkon të drejtat e veta me dinjitet, kulturë dhe argument”, përfundoi Selami Kolonja. Gazeta Flaka