VLEN të mos frigohet nga studentët shqiptarë – protestat nuk janë kërcënim, por alarm demokratik

Editorial Flaka

Në vend që të lexohet si presion politik apo “rrezik”, protesta e studentëve shqiptarë duhet të kuptohet si sinjal i qartë institucional: diçka nuk po funksionon në mënyrë të barabartë në praktikën e zbatimit të ligjeve dhe të të drejtave gjuhësore.

Reagimet politike të ditëve të fundit, përfshirë edhe qëndrimet brenda kampit të VLEN, tregojnë një tendencë të gabuar: leximin e protestës si “presion i organizuar” në vend të asaj që është në thelb — kërkesë për barazi institucionale dhe respektim të ligjit.

Studentët që protestojnë nuk po kërkojnë privilegje. Ata po kërkojnë që një e drejtë e përcaktuar me ligj të mos mbetet në letër. Debati rreth provimit të jurisprudencës në gjuhën shqipe është vetëm pika më e dukshme e një problemi më të gjerë: funksionimi real i Ligji për Përdorimin e Gjuhëve në institucionet shtetërore.

Në këtë kontekst, qëndrimet e ministrit Igor Filkov janë bërë pjesë e debatit publik, duke nxitur reagime dhe pakënaqësi tek një pjesë e studentëve dhe opinionit shqiptar. Por përgjigjja politike ndaj këtij pakënaqësie nuk mund të jetë nënvlerësimi apo relativizimi i protestës.

Frika nga protestat është gjithmonë shenjë e dobësisë institucionale, jo e forcës politike. Një koalicion qeverisës si VLEN nuk duhet ta shohë këtë lëvizje si kërcënim elektoral apo si “instrumentalizim”, por si një test serioz i kapacitetit të tij për të garantuar barazi reale, jo vetëm retorike.

Studentët nuk po kërkojnë rrëzim qeverish. Ata po kërkojnë zbatim ligji. Dhe në një shtet funksional, kjo nuk duhet të jetë as temë debati, as arsye për tension politik.

Në fund, mesazhi është i thjeshtë: institucionet nuk forcohen duke u mbrojtur nga kritika, por duke u përballur me të.