Nikolla Gruevski me shtetësi hungareze, a mbyllet kapitulli i ekstradimit?

Ish-kryeministri i Maqedonisë së Veriut, Nikolla Gruevski, i cili jeton në Budapest që nga viti 2018, dyshohet se ka marrë shtetësinë hungareze në vitin 2022, raportoi portali investigativ “VSquare”, duke iu referuar burimeve brenda qeverisë hungareze.

Sipas të njëjtave burime, Gruevski vazhdon të qëndrojë në Hungari, gjë që, sipas raportit, i zvogëlon ndjeshëm mundësitë për ekstradimin e tij në Maqedoninë e Veriut.

Portali thekson se shtetësia thuhet se i është dhënë në bazë të “interesit kombëtar të Hungarisë”, duke i ofruar një mbrojtje juridike më të fortë sesa statusi i azilit politik që mori pas arratisjes së tij, nën qeverinë e kryeministrit hungarez Viktor Orbán.

Sipas “VSquare”, ndryshe nga azili politik – i cili mund të revokohet – heqja e shtetësisë është një procedurë shumë më e ndërlikuar ligjërisht dhe do të kërkonte prova se ajo është fituar përmes mashtrimit ose korrupsionit. Një proces i tillë potencialisht do të hapte edhe çështje për rolin e zyrtarëve të lartë të qeverisë hungareze të asaj kohe.

Çështja është rikthyer në fokus pas zhvillimeve të fundit politike në Hungari dhe deklaratave të liderit opozitar Peter Magyar, i cili ka paralajmëruar se vendi nuk duhet të shërbejë si strehë për persona të akuzuar për vepra penale. Pas këtyre mesazheve, disa figura politike që kishin përfituar azil në Hungari thuhet se janë larguar nga vendi.

Nikolla Gruevski u arratis nga Maqedonia e Veriut në nëntor të vitit 2018, pak para nisjes së vuajtjes së dënimit prej dy vitesh burg në rastin “Tanku”, që kishte të bënte me blerjen e një automjeti luksoz “Mercedes”, me vlerë rreth 600 mijë euro.