Trotinetët elektrikë po shtohen, bashkë me ta edhe përgjegjësitë

Ministria e Punëve të Brendshme (MPB) dhe Këshilli Republikan për Siguri në Komunikacionin Rrugor (KRSKRr) kanë nisur një fushatë të përbashkët për rritjen e sigurisë së përdoruesve të trotinetëve elektrikë, në kohën kur shqetësimet për aksidentet rrugore po shtohen në vend.

Përmes një video spoti edukativ, institucionet informojnë qytetarët për detyrimet ligjore dhe rekomandimet për vozitje të sigurt, ndërsa në material përfshihen edhe dëshmi nga persona të përfshirë në aksidente, si dhe vlerësime mjekësore për pasojat që mund të shkaktojnë lëndimet në komunikacion.

“Kjo fushatë synon të rrisë ndërgjegjësimin për respektimin e rregullave në komunikacion dhe përdorimin e sigurt të trotinetëve elektrikë”, thuhet në njoftimin e institucioneve.

Fushata vjen vetëm pak ditë pas aksidentit tragjik në fshatin Çerkez të Kumanovës, ku humbi jetën një futbollist 13-vjeçar pasi u godit nga një veturë teksa po lëvizte me trotinet elektrik. Sipas informacioneve nga Ministria e Punëve të Brendshme, i mituri nuk arriti t’u mbijetojë plagëve të marra nga aksidenti.

Ngjarja ka rikthyer sërish në fokus shqetësimet për sigurinë rrugore, veçanërisht pas tragjedisë së fundit në qarkoren e Shkupit, ku vetëm pak ditë më parë humbën jetën katër persona, duke nxitur reagime të shumta për gjendjen e sigurisë në komunikacion. Gazeta Flaka