Nuhiu merr drejtimin e “Parkingjeve dhe Gjelbërimit” në Gostivar – Prioritet më shumë hapësira të gjelbra

Bejtulla Nuhiu është zgjedhur ushtrues detyre drejtor i Ndërmarrjes Publike “Parkingjet dhe Gjelbërimi” në Gostivar, si kuadër i Bashkimit Demokratik për Integrim (BDI) në kuadër të bashkëqeverisjes me Aleancën për Shqiptarët.

Në një prononcim për Gazetën Flaka, Nuhiu tha se fokusi i tij kryesor në drejtimin e ndërmarrjes do të jetë përmirësimi i menaxhimit të parkingjeve publike dhe rritja e kujdesit për hapësirat e gjelbra.

“Prioriteti ynë do të jetë rritja e rregullsisë në parkingjet zonale, përmirësimi i shërbimeve për qytetarët, si dhe shtimi i kapaciteteve për mirëmbajtjen e hapësirave të gjelbra brenda dhe jashtë qytetit”, deklaroi Nuhiu.

Ai theksoi se ndërmarrja do të angazhohet për rritjen e efikasitetit operacional dhe krijimin e një ambienti më të pastër dhe më funksional për qytetarët e Gostivarit.

Kush është Bejtulla Nuhiu?

Bejtulla Nuhiu ka lindur më 1 maj 1982 në Gostivar. Është i diplomuar në Biznes dhe Administrim – drejtimi Marketing në Universitetin e Evropës Juglindore në Tetovë.

Karrierën profesionale e ka nisur si mësimdhënës i gjuhës angleze në SHF “Përparimi” në Çegran. Më pas ka punuar në Sekretariatin për Zbatimin e Marrëveshjes Kornizë, ndërsa nga viti 2011 deri në vitin 2021 ka qenë këshilltar në Ministrinë e Ekonomisë në Sektorin për Lëndë të Para Minerale.

Nga viti 2021 deri në mars 2025 ka ushtruar detyrën e bashkëpunëtorit profesional për buxhetim, planifikim dhe analiza në Fondin për Sigurim Shëndetësor të Maqedonisë së Veriut, ndërsa nga prilli i vitit 2025 ka punuar si kontrollor i kontributeve në Njësinë Rajonale të Fondit në Gostivar.

Nuhiu njihet për përvojën e tij shumëvjeçare në administratën publike, në fushën e financave, planifikimit dhe menaxhimit administrativ.

Ndërmarrja Publike “Parkingjet dhe Gjelbërimi” është përgjegjëse për menaxhimin e parkingjeve publike në territorin e Gostivarit, organizimin dhe kontrollin e parkimit zonal, si dhe për mirëmbajtjen e parqeve, sipërfaqeve të gjelbra, drunjve dhe inventarit urban. Duke pasur parasysh këto përgjegjësi, prioritetet e paralajmëruara nga Bejtulla Nuhiu për vendosjen e më shumë rregulli në parkingjet zonale dhe forcimin e kapaciteteve për mirëmbajtjen e gjelbërimit pritet të jenë në fokus të punës së ndërmarrjes në periudhën e ardhshme. Gazeta Flaka