Lamtumirë Nexho: Debreshi vajton humbjen e një veprimtari të përkushtuar

Një ngjarje e rëndë ka tronditur fshatin Debresh të Gostivarit. Në moshën 64-vjeçare ka ndërruar jetë Nexhmedin Memedi, një figurë e njohur dhe e respektuar e komunitetit.

Sipas informacioneve që ka siguruar Flaka, Memedi është gjetur pa shenja jete në rezervuarin e ujit të fshatit Debresh. Ai kishte shkuar atje për të lëshuar ujin për nevojat e fshatit. Rrethanat e vdekjes ende nuk janë sqaruar plotësisht, ndërsa për momentin dihet se ai është gjetur i pajetë në rezervuarin e vjetër të ujit të fshatit.

Nexhmedin Memedi njihej si një aktivist i përkushtuar qytetar dhe dashamir i madh i vendlindjes së tij. Për vite me radhë ai shërbeu si kryetar i Bashkësisë Lokale të Debreshit, duke dhënë kontribut të rëndësishëm në zhvillimin e fshatit dhe në përmirësimin e jetës së banorëve.

Ai ishte gjithashtu luftëtar i UÇK-së, duke lënë gjurmë me angazhimin dhe sakrificën e tij për çështjen kombëtare.

Lajmi për vdekjen e tij ka ngjallur reagime të shumta dhe mesazhe ngushëllimi nga shoqata, aktivistë dhe qytetarë.

“Nexha ishte një njeri me zemër të madhe, i fortë në karakter, plot vullnet dhe frymëzim për të gjithë ne. Edhe pse në moshë, energjia, buzëqeshja dhe dashuria e tij për çiklizmin ishin shembull për çdo anëtar të shoqatës sonë. Rrugët që përshkuam së bashku do të mbajnë gjithmonë gjurmët e përkushtimit, forcës dhe shpirtit të tij të pathyeshëm”, thuhet në mesazhin e Shoqatës së Ciklistëve, e cila shprehu ngushëllimet më të sinqerta për familjen dhe të afërmit.

Edhe Shoqata “Debreshi” reagoi pas tragjedisë, duke shkruar: “Me zemër e shpirt jemi të prekur nga kjo tragjedi. I përjetshëm qoftë kujtimi për ty, Nexho!”

Në një mesazh prekës, Forumi Rinor i Debreshit (FRD) kujtoi thjeshtësinë dhe gatishmërinë e tij për të ndihmuar në çdo aktivitet të fshatit.

“Sa herë që dëshironim të realizonim ndonjë aktivitet në fshat, me buzëqeshjen dhe thjeshtësinë që e karakterizonte, na thoshte: ‘Nëse ju del mirë, thuni FRD e ka bo; nëse ju del keq, thuni Nexha e ka bo!’ Këto fjalë sot na tingëllojnë më ndryshe, sepse Debreshi ka humbur një njeri të veçantë”, thuhet në reagimin e FRD-së.

Ata e përshkruan Memedin si një njeri që ishte gjithmonë i gatshëm të jepte kontribut për të mirën e fshatit, një dashamir të sportit dhe një mbështetës të aktiviteteve rinore e shoqërore.

Ndarja e tij nga jeta përbën një humbje të madhe për familjen, miqtë, bashkëfshatarët dhe gjithë komunitetin e Debreshit.

Redaksia e Flakës shpreh ngushëllimet më të sinqerta familjes Memedi, të afërmve dhe miqve të të ndjerit.

Qoftë i përjetshëm kujtimi për Nexhmedin Memedin. Gazeta Flaka