Përplasje e ashpër ZNAM-LSDM, akuzat kalojnë në nivel personal

Kryetari i Lëvizjes ZNAM, Maksim Dimitrievski, deklaroi se arsyeja kryesore për hyrjen e partisë së tij në koalicionin qeveritar ishte parandalimi i përsëritjes së, siç tha ai, skenarëve negativë politikë nga e kaluara dhe mbrojtja më e fuqishme e interesave kombëtare maqedonase.

Duke folur në emisionin “Top Tema” në Telma, Dimitrievski theksoi se ZNAM u bë pjesë e qeverisë për të siguruar që qytetarët maqedonas të mos ndihen të diskriminuar në shtetin e tyre.

“ZNAM hyri në këtë koalicion që të mos shihnim përsëritje të asaj që ndodhi në të kaluarën. Motivet tona për të hyrë në qeveri ishin që maqedonasit të mos ndiheshin më si qytetarë të dorës së dytë në vendin e tyre”, deklaroi Dimitrievski.

Ai sqaroi se ZNAM nuk ka nënshkruar marrëveshje formale koalicioni me VMRO-DPMNE-në dhe koalicionin VLEN, por se pas zgjedhjeve parlamentare është arritur marrëveshje për një program të përbashkët qeveritar që përfshin prioritetet dhe angazhimet programore të partisë së tij.

Sipas Dimitrievskit, ministrat e ZNAM-it, Goran Minçev dhe Igor Filkov, po e zbatojnë me përkushtim programin qeveritar dhe prioritetet e Agjendës së Reformave.

Si argument për rezultatet e arritura, ai përmendi edhe vlerësimet e Presidentit të Këshillit Evropian, Antonio Costa, gjatë vizitës së tij në Maqedoninë e Veriut.

“Gjatë vizitës së tij u vlerësua progresi në administratën publike dhe sundimin e ligjit, sektorë që udhëhiqen nga kuadro të ZNAM-it”, tha Dimitrievski.

Ai riafirmoi gjithashtu qëndrimin e partisë për ndryshimet kushtetuese me kusht, duke theksuar se ky koncept mbetet zgjidhja më e pranueshme për mbrojtjen e interesave shtetërore.

“Qëndrimi ynë mbetet i pandryshuar. Koncepti i ndryshimeve kushtetuese me kusht është një zgjidhje që mbron interesat kombëtare dhe ofron garanci të qarta për shtetin dhe qytetarët”, deklaroi ai.

Megjithatë, deklaratat e Dimitrievskit shkaktuan reagim të ashpër nga LSDM-ja. Nga partia opozitare thanë se arsyeja e vërtetë e hyrjes së ZNAM-it në qeveri është e njohur për opinionin publik.

“Të gjithë e dinë pse ZNAM hyri në koalicionin e tenderit me grupin e krimit të organizuar VMRO-DPMNE”, thuhet në reagimin e LSDM-së.

Socialdemokratët akuzojnë Dimitrievskin se fillimisht tradhtoi partinë e tij dhe më pas votuesit që e mbështetën.

“Pasi partia filloi të shpërbëhej, deputetë dhe këshilltarë nisën ta braktisnin një nga një. E vetmja gjë që i mbeti Maksos ishte të realizonte avancimin që mori nga Mickoski”, thuhet në reagim.

LSDM-ja shkon edhe më tej, duke pretenduar se ZNAM nuk funksionon si subjekt i pavarur politik.

“ZNAM nuk është parti politike. ZNAM është satelit i VMRO-DPMNE-së, një organizatë e krijuar dhe e financuar nga Hristijan Mickoski për të shkatërruar opozitën, për të ngatërruar votuesit dhe për të sulmuar opozitën gjatë dy viteve të fundit”, theksojnë nga LSDM.

Partia opozitare akuzon gjithashtu drejtuesit e ZNAM-it se interesat personale janë motivi kryesor i veprimit të tyre politik.

“Programi i vetëm është interesi personal dhe quhet ‘xhep’. Tani, kur partia juaj po shpërbëhet dhe qytetarët që ju besuan janë mashtruar, mbetet vetëm një pyetje: Kur do ta shpallë Prokuroria aplikimin për tenderët në Postë?”, thuhet në fund të reagimit të LSDM-së.

Polemikat mes ZNAM-it dhe LSDM-së vijnë në një periudhë kur debati politik në vend është fokusuar te funksionimi i koalicionit qeveritar, reformat evropiane dhe çështja e ndryshimeve kushtetuese. Gazeta Flaka