Tensionet në rritje: Fondacioni bullgar “Maqedonia” paralajmëron bllokadë të tri pikave kufitare me Maqedoninë e Veriut

Tensionet mes Shkupit dhe Sofjes rrezikojnë të marrin një dimension të ri gjatë fundjavës. Fondacioni bullgar “Maqedonia” ka njoftuar se të dielën do të organizojë bllokim demonstrativ të tri pikave kufitare ndërmjet Bullgarisë dhe Maqedonisë së Veriut.

Sipas njoftimit të organizatës, aksioni do të zhvillohet nga ora 11:00 deri në 13:00 dhe është koordinuar me autoritetet kompetente bullgare. Nga fondacioni bëjnë të ditur se qëllimi i protestës është dërgimi i një mesazhi politik ndaj autoriteteve në Shkup lidhur me, siç pretendojnë ata, trajtimin e bullgarëve në Maqedoninë e Veriut.

“Nuk mund të vazhdojë persekutimi i bullgarëve, sulmet ndaj tyre dhe vendimet e montuara gjyqësore. Me këtë aksion duam t’i tregojmë kryeministrit Hristijan Mickoski se Bullgaria dhe qytetarët bullgarë nuk do të heshtin”, thuhet në thirrjen publike të Fondacionit “Maqedonia”.

Nga organizata theksojnë se bllokada do të jetë paqësore dhe se nuk synon të pengojë plotësisht qarkullimin e qytetarëve, por të tërheqë vëmendjen ndaj çështjeve që ata i konsiderojnë problematike në marrëdhëniet mes dy vendeve.

Njoftimi vjen vetëm pak ditë pasi në Shkup u dogjën dy automjete diplomatike të Ambasadës së Bullgarisë. Rasti shkaktoi reagime të shumta në Bullgari dhe u përmend edhe gjatë debatit në Parlamentin Evropian për raportin e progresit të Maqedonisë së Veriut.

Ndërkohë, autoritetet maqedonase kanë bërë të ditur se rasti është zbardhur, ndërsa i dyshuari për djegien e automjeteve është identifikuar dhe ndaj tij është ngritur procedurë penale.

Paralajmërimi për bllokimin e pikave kufitare pritet të rrisë më tej tensionet politike mes Shkupit dhe Sofjes, në një periudhë kur marrëdhëniet mes dy vendeve vazhdojnë të ndikojnë drejtpërdrejt edhe në procesin eurointegrues të Maqedonisë së Veriut. Gazeta Flaka