Në ditën kur Parlamenti Evropian alarmon për marrëdhëniet ndëretnike, Kushtetuesja rrëzon emërtimet shqiptare në Tetovë

Në ditën kur Parlamenti Evropian alarmon për marrëdhëniet ndëretnike, Gjykata Kushtetuese “fshin” emrat shqiptarë të rrugëve në Tetovë, shkruan Flaka

Parlamenti Evropian ka miratuar sot raportin më të fundit për Maqedoninë e Veriut, duke dërguar një sërë mesazhesh kritike për institucionet e vendit në lidhje me sundimin e ligjit, korrupsionin, marrëdhëniet ndëretnike, lirinë e mediave dhe procesin e integrimit evropian.

Raporti i kushton rëndësi të veçantë ruajtjes së karakterit multietnik të shtetit dhe respektimit të Marrëveshjes Kornizë të Ohrit, duke theksuar se të drejtat e komuniteteve dhe zbatimi praktik i saj mbeten elemente kyçe për stabilitetin dhe progresin demokratik të vendit.

Në këtë kontekst, Parlamenti Evropian miratoi edhe amendamentin që i bën thirrje autoriteteve të Maqedonisë së Veriut të zgjidhin sa më shpejt çështjen e përdorimit të gjuhës shqipe në provimet shtetërore dhe të shmangin paraqitjen e protestave studentore si të motivuara politikisht apo si faktor destabilizues.

Megjithatë, pikërisht në të njëjtën ditë, Gjykata Kushtetuese e Maqedonisë së Veriut njoftoi se ka pranuar iniciativën për vlerësimin e kushtetutshmërisë dhe ligjshmërisë së vendimit të Këshillit të Komunës së Tetovës nr. 07-766, të datës 24 prill 2007, duke e shfuqizuar atë si akt të paligjshëm.

Vendimi lidhet me riemërtimin e një numri rrugësh dhe shesheve në Tetovë, një proces që prej vitesh është konsideruar nga shqiptarët si pjesë e afirmimit të identitetit dhe trashëgimisë historike të komunitetit në këtë qytet.

Kjo lëvizje e Gjykatës Kushtetuese vjen në një moment kur institucionet evropiane po kërkojnë më shumë kujdes në raportet ndëretnike dhe më shumë respekt për frymën e Marrëveshjes së Ohrit. Për shumë vëzhgues, përplasja mes mesazheve që vijnë nga Brukseli dhe zhvillimeve të brendshme institucionale në vend rrezikon të hapë debate të reja politike dhe etnike.

Raporti i Parlamentit Evropian dërgon një mesazh të qartë se progresi i Maqedonisë së Veriut drejt Bashkimit Evropian nuk do të matet vetëm me përmbushjen e kritereve teknike, por edhe me garantimin e sundimit të ligjit, luftën kundër korrupsionit, respektimin e të drejtave të komuniteteve, pavarësinë e institucioneve dhe funksionimin e një demokracie gjithëpërfshirëse.

Në këtë prizëm, vendimi i fundit i Gjykatës Kushtetuese pritet të nxisë reagime të shumta politike dhe publike, veçanërisht në Tetovë, ku çështja e emërtimeve të rrugëve mbetet e lidhur ngushtë me identitetin, historinë dhe përfaqësimin e komunitetit shqiptar. Gazeta Flaka