Kanita Ramadani nga BDI: Pa mekanizma dhe sanksione, përfaqësimi i drejtë mbetet vetëm slogan politik

Anëtarja e BDI-së, Kanita Ramadani, ka reaguar ndaj propozimeve për rregullimin e përfaqësimit të drejtë pas shfuqizimit të Balancuesit, duke vlerësuar se të drejtat e shqiptarëve nuk mund të mbështeten në premtime politike, por duhet të garantohen me mekanizma të qartë ligjorë.

Sipas saj, qytetarëve shqiptarë po u kërkohet të besojnë se përfaqësimi i drejtë do të sigurohet pa obligime konkrete dhe pa masa ndëshkuese për institucionet që nuk e zbatojnë ligjin.

“Pas shfuqizimit të Balancuesit, qytetarëve shqiptarë po u kërkohet të besojnë se përfaqësimi i drejtë do të garantohet pa mekanizma të qartë, pa obligime konkrete dhe pa sanksione për ata që nuk e zbatojnë ligjin. Me fjalë të tjera, po na kërkohet të zëvendësojmë garancitë ligjore me premtime politike”, deklaroi Ramadani.

Ajo theksoi se pa mekanizma obligues dhe pa përgjegjësi për shkelësit, përfaqësimi i drejtë mbetet vetëm në nivel deklarativ.

“Pa mekanizma obligues, përfaqësimi i drejtë mbetet vetëm slogan politik. Të drejtat nuk mbrohen me konferenca për shtyp dhe deklarata triumfaliste, por me dispozita të qarta që obligojnë institucionet. Pa sanksione për shkelësit, ligji mbetet letër pa vlerë”, u shpreh ajo.

Ramadani rikujtoi se përfaqësimi i drejtë është parim i dalë nga Marrëveshja e Ohrit dhe nuk mund të varet nga vullneti i pushtetit të radhës.

“Përfaqësimi i drejtë nuk mund të lihet në mëshirën e pushtetit. Marrëveshja e Ohrit e vendosi atë si parim dhe obligim shtetëror, jo si favor politik që jepet sipas dëshirës së qeverisë së radhës”, tha ajo.

Sipas saj, për më shumë se dy dekada Marrëveshja e Ohrit ka qenë themeli i stabilitetit dhe bashkëjetesës ndëretnike në vend, ndërsa tentativat për zbehjen e garancive të saj përbëjnë hap prapa.

“Shqiptarët nuk kërkojnë privilegje. Nuk kërkojnë lëmoshë politike. Kërkojnë atë që u takon: barazi të garantuar, përfaqësim real dhe respektim të plotë të frymës dhe shkronjës së Marrëveshjes së Ohrit. Kur hiqen garancitë dhe mbeten vetëm premtimet, atëherë nuk kemi reformë, kemi kthim prapa të paketuar si sukses politik”, përfundoi Ramadani. Gazeta Flaka