90 për qind e premtimeve të VMRO-DPMNE-së mbetën të parealizuara. Ja kush e thotë!

LSDM ka akuzuar kryeministrin Hristijan Mickoski dhe VMRO-DPMNE-në se, dy vjet pas ardhjes në pushtet, shumica dërrmuese e premtimeve të dhëna para qytetarëve nuk janë realizuar.

Sipas opozitës, analiza e programit qeverisës “Platforma #1198” tregon se deri më tani janë përmbushur shumë pak nga zotimet e bëra gjatë fushatës, ndërsa “deri në 90 për qind e premtimeve kanë mbetur të parealizuara”.

“Mickoski dhe VMRO-DPMNE premtuan standard më të lartë jetese, ndërsa sot portofolet dhe frigoriferët e qytetarëve janë më të zbrazët. Premtuan inflacion prej 2.5 për qind, por çmimet e ushqimeve vazhdojnë të rriten dhe inflacioni ka arritur në 4.8 për qind”, thuhet në reagimin e LSDM-së.

Partia opozitare pretendon se ka dështuar edhe në fushën ekonomike, duke theksuar se investimet e huaja janë ulur ndjeshëm, ndërsa qytetarët po përballen me rritje të varfërisë dhe rënie të fuqisë blerëse.

“Premtuan vende të reja pune dhe paga më të larta, por qytetarët përballen me varfëri në rritje. Premtuan ulje të huamarrjes, ndërsa borxhi është rritur për 2.5 miliardë euro. Premtuan 180 milionë euro mbështetje për fermerët, por subvencionet janë ulur për 40 milionë euro”, deklaron LSDM.

Nga kjo parti kritikojnë edhe rezultatet në luftën kundër korrupsionit dhe procesin e integrimit evropian.

“Premtuan drejtësi dhe luftë kundër korrupsionit, por publiku po dëshmon skandale tenderësh me vlerë mbi 150 milionë euro. Premtuan përparim drejt Bashkimit Evropian, ndërsa sot vendi ka një rrugë evropiane të bllokuar, pa reforma dhe pa rezultate”, thuhet në reagim.

Në fund, LSDM vlerëson se bilanci i qeverisë pas dy vitesh është negativ, duke theksuar se “rezultati i premtimeve të përmbushura të Mickoskit është zero”. Gazeta Flaka