Vakancë në krye të komunës së Bërvenicës – pritet vendim institucional

Nëse një kryetar komune në Maqedoninë e Veriut ndërron jetë gjatë mandatit, mandati i tij përfundon automatikisht dhe aktivizohen dispozitat e Ligjit për Vetëqeverisje Lokale dhe Kodit Zgjedhor, shkruan Flaka

Funksioni i kryetarit mbetet vakant për shkak të vdekjes së tij. Kryetari i Këshillit Komunal merr përkohësisht ushtrimin e funksionit të kryetarit të komunës deri në zgjedhjen e kryetarit të ri, sipas dispozitave të vetëqeverisjes lokale dhe praktikës institucionale. Kjo është arsyeja pse në raste të tilla shpesh flitet për “ushtrues detyre i kryetarit”.

“Deri në zgjedhjen e kryetarit të ri, komuna vazhdon të funksionojë normalisht, me ushtruesin e detyrës që ushtron kompetencat e kryetarit. Kjo është konfirmuar edhe në rastin e Komunës së Gostivarit, ku u argumentua se ushtruesi i detyrës mbetet në funksion deri në zgjedhjen e kryetarit të ri”, parashikon dispozita ligjore.

Shpallen zgjedhje të parakohshme për kryetar komune, në përputhje me Kodin Zgjedhor, pasi mandati ka përfunduar para kohe.

Ka një përjashtim, nëse deri në zgjedhjet e rregullta lokale kanë mbetur më pak se gjashtë muaj, nuk mbahen zgjedhje të parakohshme dhe funksioni ushtrohet sipas zgjidhjes së përkohshme të paraparë me ligj. Por në rastin konkret, mandati i të ndjerit ishte në vitin e parë qeverisës, dhe kësisoji, do të duhet të organizohen zgjedhje të parakohshme.

Në vitet e fundit ligji është ndryshuar disa herë për raste specifike, duke lejuar që ushtruesit e detyrës në disa komuna të vazhdojnë deri në zgjedhjet e ardhshme lokale, me qëllim shmangien e kostove të zgjedhjeve të parakohshme kur ato janë afër.

Pra, në rastin konkret të ndarjes nga jeta të kryetarit të Komunës së Bërvenicës, Jovica Ilievski, më 23 qershor 2026, mandati i tij përfundon automatikisht dhe duhet të zbatohen dispozitat e Ligjit për Vetëqeverisje Lokale. Lajmi për vdekjen e tij është konfirmuar nga mediat dhe institucionet.

Në zgjedhjet lokale të vitit 2021 në Bërvenicë, partitë shqiptare në fakt ia lehtësuan fitoren VMRO-DPMNE-së për shkak të përçarjes dhe mungesës së një kandidati të përbashkët.

Kandidati i VMRO-DPMNE-së, Jovica Ilievski, fitoi komunën me vetëm 36 vota diferencë ndaj kandidatit të pavarur shqiptar Enver Pajaziti. Sipas analizave të paszgjedhjeve, në raundin e parë partitë shqiptare garuan të ndara dhe nuk arritën marrëveshje për një kandidat të përbashkët, gjë që shpërndau votën shqiptare në një komunë ku shqiptarët përbëjnë shumicën e popullsisë.

Në atë periudhë, në nivel shtetëror ekzistonte bashkëpunimi opozitar mes VMRO-DPMNE-së dhe koalicionit të atëhershëm të Aleanca për Shqiptarët dhe Alternativa për zgjedhjet lokale, por në Bërvenicë nuk u arrit një formulë që do të bashkonte votën shqiptare rreth një kandidati të vetëm.

Politikisht, Bërvenica u konsiderua një nga humbjet më të diskutueshme të bllokut shqiptar në vitin 2021, sepse Komuna ka shumicë shqiptare, fitorja e VMRO-DPMNE-së erdhi me diferencë minimale dhe shuma e votave të kandidatëve shqiptarë në raundin e parë ishte dukshëm më e madhe se diferenca përfundimtare prej 36 votash.

Në zgjedhjet e vitit 2025, Haqim Ramadani ishte kandidat i VLEN-it për Komunën e Bërvenicës dhe u paraqit si figurë e koalicionit shqiptar në garë kundër VMRO-DPMNE-së në nivel komunal.

Në fushatë dhe në deklarata publike është vërejtur një distancim politik i pjesshëm në disa momente. Ai ka pasur qëndrime të pavarura në terren dhe mesazhe që shpesh nuk janë perceptuar si strikt partiake. Në disa periudha është interpretuar si “jo plotësisht i disiplinuar brenda linjës së VLEN-it”, sidomos për shkak të komunikimit të drejtpërdrejtë me elektoratin dhe mesazheve më lokale sesa partiake.

Ramadani është rikthyer pastaj në linjën e koalicionit në fazat vendimtare të fushatës. Ka marrë pjesë në aktivitete të përbashkëta me strukturat e VLEN-it dhe me AKI-në në disa raste të mobilizimit elektoral në diasporë dhe terren, por kjo nuk mjaftoi për fitore/

Në një komunë si Bërvenica ku gara është shumë e ngushtë, çdo “çarje” ose “lëvizje brenda kampit” ndikon direkt në votë, e sidomos në balotazh, ku votat shqiptare dhe maqedonase shpesh vendosin me diferenca shumë të vogla.

as ndarjes së tij nga jeta, çështja kryesore bëhet se si do të rreshtohen forcat politike në zgjedhjet e ardhshme lokale. Gazeta Flaka