ASH vazhdon riorganizimin e strukturave, Genc Selmani zgjidhet kryetar i Degës në Kërçovë

Aleanca për Shqiptarët ka vazhduar procesin e konsolidimit të strukturave partiake, duke zgjedhur të martën organet e reja drejtuese të Degës në Kërçovë.

Në kuvendin e degës, me shumicën e votave të delegatëve të pranishëm, për kryetar u zgjodh Genc Selmani.

Gjatë punimeve u zgjodhën edhe kryesia, sekretariati, si dhe delegatët që do ta përfaqësojnë Degën e Kërçovës në Kongresin e V të Aleancës për Shqiptarët.

Sipas partisë, kuvendi u zhvillua në një atmosferë bashkëpunimi dhe angazhimi politik, duke reflektuar, siç thuhet, unitetin dhe vendosmërinë e anëtarësisë për forcimin e organizimit të ASH-së në Kërçovë.

Kryetari i Aleancës për Shqiptarët, Arben Taravari, në fjalën e tij para të pranishmëve theksoi rëndësinë e forcimit të strukturave të partisë.

“Aleanca për Shqiptarët mbetet e përkushtuar në zgjerimin, konsolidimin dhe fuqizimin e strukturave të saj organizative, duke ndërtuar një organizim të fortë dhe funksional në çdo degë të vendit”, deklaroi Taravari.

Ai shtoi se partia do të vazhdojë angazhimin e saj politik edhe në periudhën e ardhshme.

“Me vizion të qartë dhe përkushtim të pandërprerë, Aleanca për Shqiptarët do të vazhdojë të jetë zëri i qytetarëve shqiptarë në Maqedoninë e Veriut, duke punuar me vendosmëri për mbrojtjen e interesit publik, forcimin e barazisë dhe ndërtimin e një të ardhmeje më të sigurt dhe më dinjitoze për të gjithë”, u shpreh Taravari. Gazeta Flaka