A e panë drejtuesit e VLEN-it? Edhe Ambasada e SHBA-së komunikoi në gjuhën shqipe

Në pritjen solemne të organizuar nga Ambasada e Shteteve të Bashkuara të Amerikës në Shkup me rastin e 4 Korrikut, Ditës së Pavarësisë së SHBA-së, dhe 250-vjetorit të shtetit amerikan, në ekranin zyrtar të ceremonisë mesazhet u shfaqën në gjuhën shqipe krahas gjuhës maqedonase.

Në aktivitet mori pjesë edhe zëvendëskryeministri Izet Mexhiti, i cili përmes një postimi vlerësoi rolin e SHBA-së si aleat dhe partner strategjik.

“Sonte shënuam 4 Korrikun, Ditën e Pavarësisë së Shteteve të Bashkuara të Amerikës, në vitin kur populli amerikan kremton 250-vjetorin e lindjes së shtetit të tij. Për ne, Shtetet e Bashkuara mbeten më shumë se një aleat. Janë një mik i dëshmuar në kohët më vendimtare të historisë sonë dhe një partner me të cilin ndajmë bindjen se demokracia, liria dhe përgjegjësia janë vlera që duhen mbrojtur çdo ditë”, shkroi Mexhiti.

Prania e gjuhës shqipe në skenën zyrtare të organizuar nga Ambasada e SHBA-së është parë si një pasqyrim i realitetit multietnik të Maqedonisë së Veriut dhe i standardeve që ndjekin përfaqësitë diplomatike perëndimore në vend.

Një praktikë e ngjashme u vu re edhe në pritjen e organizuar nga Ambasada e Sllovenisë në Shkup me rastin e Ditës Kombëtare të Sllovenisë dhe Ditës së Forcave të Armatosura, ku krahas gjuhës maqedonase u përdor edhe gjuha shqipe në materialet zyrtare të aktivitetit.

Sipas vlerësimeve publike, kjo qasje nuk shihet si një detaj protokollar, por si reflektim i standardeve demokratike që promovojnë përfshirjen dhe respektimin e karakterit multietnik të shtetit.

Në të njëjtën linjë është edhe Parlamenti Evropian, i cili në raportet e tij për Maqedoninë e Veriut ka theksuar rëndësinë e ruajtjes së karakterit multietnik të shtetit, zbatimit të plotë të Marrëveshja Kornizë e Ohrit dhe respektimit të të drejtave gjuhësore të komuniteteve.

Në këtë kontekst, përdorimi i gjuhës shqipe në aktivitetet e ambasadave perëndimore krijon kontrast me praktikën e disa institucioneve shtetërore në Maqedoninë e Veriut, të cilat në raste të caktuara kanë përdorur komunikim vetëm në gjuhën maqedonase gjatë manifestimeve publike.

Përdorimi i shqipes në ceremoninë e Ambasadës së SHBA-së rikthen në vëmendje faktin se gjuha shqipe është gjuhë zyrtare në përputhje me legjislacionin në fuqi dhe se përfaqësimi i saj në komunikimin publik konsiderohet pjesë e standardeve demokratike dhe e funksionimit institucional në një shtet multietnik. Gazeta Flaka