Sondazhi: Mickoski i pari, Ahmeti i dyti për besimin e qytetarëve

 Kryetari i BDI-së, Ali Ahmeti, vazhdon të jetë lideri shqiptar që gëzon besimin më të madh të qytetarëve, sipas sondazhit të realizuar nga agjencia Market Vision me porosi të portalit MKD.mk.

Në pyetjen “Te cili lider i partive politike keni besimin më të madh?”, Ahmeti është renditur në vendin e dytë në nivel të përgjithshëm me 5,5%, duke qenë njëkohësisht lideri shqiptar më i vlerësuar në këtë sondazh.

Pas tij, nga liderët shqiptarë renditen:

• Izet Mexhiti – 4,1%
• Bilall Kasami – 2,5%
• Arben Taravari – 1,0%
• Bekim Sali – 0,4%

Në nivel të përgjithshëm, listën e kryeson kryeministri Hristijan Mickoski me 23,3%, ndërsa pas Ahmetit renditen Venko Filipçe me 5,1% dhe Dimitar Apasiev me 4,0%.

Sondazhi tregon gjithashtu një nivel të lartë mosbesimi ndaj klasës politike. Plot 42,2% e të anketuarve janë përgjigjur se nuk kanë besim te asnjë lider politik, 4,8% nuk kanë dashur të përgjigjen, ndërsa 3,4% janë deklaruar se nuk e dinë.

Hulumtimi është realizuar nga 10 deri më 27 qershor në një mostër prej 1.200 të anketuarish, përfaqësuese sipas gjinisë, moshës, përkatësisë etnike, rajonit dhe llojit të vendbanimit, në përputhje me regjistrimin e popullsisë rezidente të vitit 2021.

Anketa është zhvilluar me metodën CATI (Computer Assisted Telephone Interview), me 95% nivel besueshmërie dhe marzh gabimi ±3%. Gazeta Flaka