Fund tragjik për tre të zhdukurit nga Kosova, u gjetën të vdekur në rrugën Bllacë–Shkup

Tre shtetas të Kosovës, të cilët u raportuan të zhdukur pasi humbën kontaktet me familjarët pas mbërritjes në Aeroportin e Shkupit, janë gjetur të vdekur në një veturë të përmbysur në rrugën drejt pikës kufitare Bllacë.

Sipas Ministrisë së Punëve të Brendshme, rreth orës 22:35 të së shtunës është raportuar për një automjet të tipit Mercedes me targa gjermane të përmbysur pranë aksit rrugor Bllacë–Shkup. Në vendngjarje, policia ka gjetur tre persona pa shenja jete – një burrë dhe dy gra – ndërsa vdekja e tyre është konstatuar nga ekipi i Ndihmës së Shpejtë.

Rasti kishte nisur të trajtohej disa orë më herët si zhdukje. Në orën 13:40, një shtetas i Kosovës kishte njoftuar policinë se kishte humbur kontaktin me tre familjarët, me të cilët kishte folur për herë të fundit më 18 korrik, rreth orës 22:15, kur ata ndodheshin në Aeroportin Ndërkombëtar të Shkupit dhe ishin nisur drejt Kosovës.

Sipas familjarëve, viktimat janë identifikuar si Ejup Ternava, Cennet Ternava dhe Fatmire Shabani. Ata po udhëtonin me një Mercedes GLC me ngjyrë blu dhe, sipas dyshimeve të para, aksidenti ka ndodhur në segmentin rrugor drejt pikës kufitare Bllacë, para se të arrinin në kufi.

Autoritetet po zhvillojnë hetime për të sqaruar rrethanat e aksidentit fatal. Gazeta Flaka