Nga zija familjare te Presidenca: vetëm 41 ditë që ndryshuan jetën e Justina Shiroka-Pulës

Nga një pasdite në banesën e saj, me mysafirë nga Sarajeva, në kolltukun e Presidentes së Kosovës – një kthesë e jashtëzakonshme brenda pak orësh, shkruan Gazeta Flaka

Vetëm 41 ditë më parë, Justina Shiroka-Pula përjetoi një nga humbjet më të mëdha personale. Më 26 gusht 2026 ndërroi jetë bashkëshorti i saj, Blerim Ymer Pula, ndërsa familja njoftoi se varrimi do të zhvillohej të nesërmen në Prishtinë.

Më 28 dhe 29 gusht, ajo do të qëndronte në zi, në ditët e pamjes për bashkëshortin e saj.

Pak më shumë se një muaj më vonë, jeta e saj mori një kthesë që vështirë se mund të imagjinohej.

Mbrëmjen e 6 tetorit, ndërsa në Kosovë zhvillohej një betejë politike për zgjedhjen e presidentit të ri dhe afati kushtetues po i afrohej fundit, emri i Justina Shiroka-Pulës doli papritur në skenën politike.

Kryeministri Albin Kurti e propozoi atë për Presidente të Republikës së Kosovës, duke e bërë të ditur kandidaturën në konferencë për media. Por vetë Shiroka-Pula, sipas raportimeve të mediave, nuk ishte konsultuar paraprakisht.

Kur u kontaktua nga emisioni “Debat Plus”, përgjigjja e saj ishte e shkurtër:

“Kam mysafir nga Sarajeva.”

Një fjali e zakonshme për një pasdite në shtëpi, por që brenda pak orësh do të merrte një kuptim krejt tjetër.

Ajo që ndodhi më pas ishte një prej kthesave më të shpejta politike në historinë e saj personale.

Në orët e vona të 6 tetorit, Kuvendi i Kosovës hyri në procedurën e votimit për presidentin. Në garë ishin Justina Shiroka-Pula dhe Eliza Hoxha. Pas votimit të fshehtë, Kuvendi njoftoi se Shiroka-Pula mori 81 vota, duke u zgjedhur Presidente e Republikës së Kosovës.

Ajo dha betimin para deputetëve dhe zyrtarisht mori detyrën e Presidentes.

Nga akademia në Presidencë

Justina Shiroka-Pula nuk ishte një emër i panjohur në jetën publike të Kosovës.

Ekonomiste dhe profesoreshë universitare, ajo ka ndërtuar një karrierë të gjatë akademike në Universitetin e Prishtinës. Ka shërbyer edhe si ministre e Energjisë dhe Minierave nga viti 2008 deri më 2011, ndërsa në vitin 2025 u zgjodh kryetare e Akademisë së Shkencave dhe të Arteve të Kosovës, duke u bërë gruaja e parë në krye të këtij institucioni.

Tani, në moshën 73-vjeçare, ajo kalon nga drejtimi i institucionit më të lartë shkencor të Kosovës në postin më të lartë shtetëror.

Por ajo që e bën edhe më të pazakontë këtë kapitull të ri është koha.

Më 26 gusht, humbi bashkëshortin. Më 6 tetor, emri i saj u propozua për Presidente. Pak orë më vonë, ajo u zgjodh Presidente.

Një interval prej vetëm 41 ditësh ndau dy ngjarje që ndryshuan rrënjësisht jetën e saj.

Dhe ndoshta pikërisht për këtë arsye, historia e Justina Shiroka-Pulës nuk është vetëm historia e një zgjedhjeje presidenciale.

Është edhe historia e një gruaje që, pas një humbjeje të madhe familjare, u gjend papritur në qendër të vëmendjes së gjithë Kosovës.

Nga një pasdite e zakonshme në banesën e saj, ku kishte mysafirë nga Sarajeva, deri te betimi në Kuvend në orët e natës. Gazeta Flaka