Dy protesta, dy qytete, një kërkesë: Institucionet të marrin përgjegjësi!
Nga revolta kundër dhunës ndaj grave në Ohër, te pakënaqësia për problemin me bagëtitë në Kriva Pallankë, qytetarët dolën sot në protestë, duke kërkuar zgjidhje konkrete nga institucionet.
Dy protesta me motive të ndryshme, por me një mesazh të përbashkët drejtuar institucioneve – qytetarët kërkojnë përgjegjësi dhe veprime konkrete. Në Ohër, qytetarë të shumtë u mobilizuan kundër dhunës ndaj grave dhe femicidit, ndërsa në Kriva Pallankë revolta u përqendrua te problemi i pazgjidhur me lopët që qarkullojnë në hapësirat publike.
Në Ohër, protesta u mbajt nën motot “Asnjë më shumë” dhe “Ohri nuk hesht”, duke bashkuar qytetarë nga qyteti dhe vende të tjera të vendit. Marshimi nisi nga sheshi kryesor dhe vazhdoi drejt Sektorit për Punë të Brendshme, për të përfunduar para gjykatës dhe Prokurorisë Publike.
Protestuesit kërkuan reagim më të vendosur institucional ndaj dhunës në familje dhe dhunës ndaj grave. Në nderim të viktimave të deritanishme të femicidit, organizatorët mbajtën një minutë heshtje.
Protestës iu bashkua edhe babai i Sarës, i cili, përveç kërkesës për drejtësi për vajzën e tij, përcolli edhe një mesazh që kjo përvojë të mos përsëritet në asnjë familje tjetër.
Protesta u organizua një javë pas rastit që tronditi opinionin publik, kur Sara Gjorgjieska nga Ohri u dhunua rëndë nga i dashuri i saj, 31-vjeçari Kristian Koraboski, dhe u hodh nga një automjet në rrugë.
Koraboski ndodhet në paraburgim prej 30 ditësh dhe ndiqet për tri vepra penale: lëndim trupor, privim të kundërligjshëm nga liria dhe rrezikim të sigurisë. Seanca gjyqësore është caktuar për 27 nëntor në Ohër.
Ndërkohë, në Kriva Pallankë, protesta kishte një tjetër shkak. Qytetarët shprehën pakënaqësinë për problemin e vazhdueshëm me lopët që qarkullojnë në hapësirat publike, duke kërkuar ndërhyrje dhe përgjegjësi nga institucionet kompetente.
Çështja është diskutuar edhe në Këshillin Komunal, ku është vënë në tavolinë një plan aksionar për zgjidhjen e problemit. Por, në vend të një dakordimi për hapat konkretë, diskutimi mes këshilltarëve është shoqëruar me përplasje dhe akuza, ndërsa problemi vazhdon të mbetet i hapur.
Qytetarët kërkojnë rend dhe siguri në hapësirat publike, ndërsa institucionet kanë paralajmëruar hapa për trajtimin e situatës.
Dy qytete, dy probleme të ndryshme dhe dy protesta që rikthejnë në vëmendje raportin mes kërkesave të qytetarëve dhe përgjegjësisë institucionale. Në Ohër kërkohet mbrojtje dhe drejtësi për viktimat e dhunës, ndërsa në Kriva Pallankë kërkohet zgjidhje për një problem që prej kohësh shqetëson banorët. Në të dy rastet, qytetarët presin që deklaratat dhe diskutimet institucionale të pasohen me veprime konkrete.















