Estonia mbyll kufirin me Rusinë nga 1 dhjetori pas sulmit ndaj kompanisë së dronëve
Estonia do të mbyllë të gjitha pikat kufitare me Rusinë nga 1 dhjetori, deklaroi ministri i Jashtëm estonez, Margus Tsahkna. Vendimi vjen pas një sulmi ndaj një kompanie estoneze të industrisë së mbrojtjes, për të cilin autoritetet e Estonisë akuzojnë Moskën.
Gjatë natës, autoritetet estoneze arrestuan tetë persona, të dyshuar për tentimvënie zjarri në kompaninë “Treod Systems”, e cila prodhon dronë. Sipas autoriteteve, urdhri për sulmin ka ardhur nga Shërbimi i Inteligjencës Ushtarake Ruse, GRU.
Shërbimi estonez i Sigurisë së Brendshme bëri të ditur se sulmi ishte organizuar “me qëllim shkaktimin e një shpërthimi dhe vënien e ndërtesës në flakë”.
Zëdhënësja e Ministrisë së Jashtme ruse, Maria Zakharova, deklaroi se nëse Estonia e mbyll vërtet kufirin, kjo do të ishte një tjetër dëshmi e asaj që ajo e cilësoi si rusofobi.
“Nëse këto janë planet e tyre reale, atëherë ato përputhen me një valë tjetër të rusofobisë agresive dhe të pakontrolluar”, tha Zakharova. Flaka
Moska vazhdimisht ka hedhur poshtë akuzat e autoriteteve evropiane për përfshirje në akte sabotimi.
“Rusia duhet ta kuptojë se veprimet armiqësore kundër Estonisë sjellin pasoja”, shkroi Tsahkna në platformën X, pa saktësuar se për sa kohë do të mbetet në fuqi mbyllja e kufirit.
Estonia, anëtare e NATO-s dhe një nga mbështetëset e fuqishme të Ukrainës, aktualisht ka tri pika kufitare të hapura me Rusinë.














