Mercedes ndal investimet në Gjermani, në tavolinë edhe mbyllja e fabrikave
Prodhuesi gjerman i automobilëve Mercedes po shqyrton mundësinë e mbylljes së fabrikave në Gjermani, për shkak të kostove të larta të prodhimit dhe mungesës së marrëveshjes me përfaqësuesit e punonjësve. Ndërkohë, drejtuesit e kompanisë kanë vendosur të pezullojnë të gjitha investimet e mëtejshme në fabrikat gjermane.
Drejtori i prodhimit, Michael Schiebe, në një intervistë të publikuar në intranetin e kompanisë, deklaroi se negociatat me këshillin e punëmarrësve dhe sindikatën IG Metall kanë ngecur dhe se, me strukturën aktuale të kostove, investimet në Gjermani nuk janë të mundshme.
Sipas tij, pavarësisht bisedimeve të shumta dhe intensive, ende nuk ka një zgjidhje konkrete.
Menaxhmenti kërkon lëshime nga punonjësit
Drejtuesit e Mercedesit po kërkojnë ndryshime në kushtet e punës dhe ulje të kostove operative. Drejtoresha e kuadrit, Britta Seeger, paralajmëroi se kompania është e detyruar të shqyrtojë konkretisht se cilat fabrika në Gjermani mund të vazhdojë t’i mbajë në funksion.
Ajo theksoi se mbyllja e fabrikave duhet të shmanget me çdo kusht, por pranoi se kjo mundësi tashmë duhet të shqyrtohet në detaje.
Sipas Schiebes, kostoja e një ore pune në prodhim në Gjermani është në disa raste deri në pesë herë më e lartë sesa në fabrikat e kompanisë në Evropën Lindore. Në rast se nuk arrihet marrëveshje, modelet e reja të Mercedesit do të prodhohen vetëm jashtë Gjermanisë.
Java e punës 40 orë, në vend të 35
Një nga çështjet kryesore të negociatave është kërkesa e menaxhmentit për zgjatjen e javës së punës nga 35 në 40 orë, pa kompensim shtesë në pagë.
Kjo kërkesë është kundërshtuar nga këshilli i punëmarrësve dhe sindikata IG Metall, të cilët e konsiderojnë javën 35-orëshe një nga arritjet më të rëndësishme të sindikatës.
Kompania synon gjithashtu të ndërhyjë në pagesat shtesë dhe përfitimet e punonjësve, përfshirë pjesëmarrjen në fitim, shpërblimet për pushime dhe ato të fundvitit.
Ndërkohë, në negociatat aktuale për pagat në industrinë metalurgjike dhe elektrike, IG Metall kërkon rritje prej pesë për qind. Menaxhmenti i Mercedesit vlerëson se një rritje e tillë do të rëndonte edhe më tej kostot e punës.
Presioni nga Kina dhe rënia e kërkesës
Drejtuesit e kompanisë arsyetojnë nevojën për masa kursimi me vështirësitë në tregun ndërkombëtar të automobilëve.
Schiebe përmendi tarifat doganore, presionin mbi çmimet, kërkesën më të ulët dhe konkurrencën e fortë, veçanërisht nga Kina.
Mercedes është përballur vitet e fundit me rënie të shitjeve dhe fitimeve, duke shtuar presionin për ristrukturimin e operacioneve dhe uljen e kostove.
Sipas paralajmërimeve të mëparshme të drejtuesve, nëse nuk arrihet ulja e shpenzimeve, mund të vihet në diskutim edhe mbyllja e dy fabrikave në Gjermani: një fabrikë për montimin e karrocerive dhe një tjetër për prodhimin e sistemeve dhe komponentëve të lëvizjes së automjeteve.
Kompania ka gjithsej 12 qendra prodhimi në Gjermani. Për momentin, negociatat me përfaqësuesit e punonjësve mbeten pa marrëveshje, ndërsa pezullimi i investimeve shton pasigurinë për të ardhmen e prodhimit të Mercedesit në vendin e tij të origjinës.














